Thukrae hue dil ki yaad aai to kya aai

Thukrā.e hue dil kī yaad aa.ī to kyā aa.ī

pheñkā huā shīsha thā TuuTā to sadā aa.ī

din zauq-e-navāzish se begāna sahī lekin

jalva hai na sho.ala hai raat aa.ī to kyā aa.ī

ishrat-gah-e-bātil kī raunaq meñ kamī kyā hai

gar bād-e-sabā jā kar ik sham.a bujhā aa.ī

baḌhtī huī betābī kuchh ruuTh ga.ī shāyad

jhaTke hue dāman se hāthoñ ko hayā aa.ī

uThtā hai qadam lekin raftār ġhunūda hai

niiñd aa ga.ī rastoñ ko manzil kī havā aa.ī

hai kuchh to 'nushūr' ehsāñ is umr-e-ravāñ kā bhī

ik roz kināre par kashtī to lagā aa.ī

Thukrae hue dil ki yaad aai to kya aai

phenka hua shisha tha TuTa to sada aai

din zauq-e-nawazish se begana sahi lekin

jalwa hai na shoala hai raat aai to kya aai

ishrat-gah-e-baatil ki raunaq mein kami kya hai

gar baad-e-saba ja kar ek shama bujha aai

baDhti hui betabi kuchh ruTh gai shayad

jhaTke hue daman se hathon ko haya aai

uThta hai qadam lekin raftar ghunuda hai

nind aa gai raston ko manzil ki hawa aai

hai kuchh to 'nushur' ehsan is umr-e-rawan ka bhi

ek roz kinare par kashti to laga aai