tirgi shama bani rahguzar mein aai

tīrgī sham.a banī rāhguzar meñ aa.ī

saa.at ik aisī bhī kal apne safar meñ aa.ī

jis jagah chehra hī meyār-e-vafā Thahrā hai

ḳhaak hī ḳhaak vahāñ dast-e-hunar meñ aa.ī

terī nazroñ meñ thī duniyā to yahī kyā kam thā

hashr ye hai ki tū duniyā kī nazar meñ aa.ī

bār-hā yāroñ ne sāhil se kahā thā ham haiñ

bār-hā naav magar apnī bhañvar meñ aa.ī

zindagī samjhūñ ise yā ki ise maut kahūñ

vo jo mehmān kī sūrat mire ghar meñ aa.ī

yuuñ bhī tārīḳh kī tārīḳh raqam hotī hai

niklī tārīḳh mahal se to khañDar meñ aa.ī

ḳhvāb hī ḳhvāb kī ta.abīr huā to jaanā

zindagī kyuuñ kisī āñkhoñ ke asar meñ aa.ī

sham.a jalte hī bujhī aur dhuāñ aisā uThā

lazzat-e-shām yahāñ ḳhvāb-e-sahar meñ aa.ī

zindagī kuchh hai 'atā' sher-o-adab hai kuchh aur

ye do-rañgī kī vabā kaisī hunar meñ aa.ī

tirgi shama bani rahguzar mein aai

saat ek aisi bhi kal apne safar mein aai

jis jagah chehra hi meyar-e-wafa Thahra hai

KHak hi KHak wahan dast-e-hunar mein aai

teri nazron mein thi duniya to yahi kya kam tha

hashr ye hai ki tu duniya ki nazar mein aai

bar-ha yaron ne sahil se kaha tha hum hain

bar-ha naw magar apni bhanwar mein aai

zindagi samjhun ise ya ki ise maut kahun

wo jo mehman ki surat mere ghar mein aai

yun bhi tariKH ki tariKH raqam hoti hai

nikli tariKH mahal se to khanDar mein aai

KHwab hi KHwab ki tabir hua to jaana

zindagi kyun kisi aankhon ke asar mein aai

shama jalte hi bujhi aur dhuan aisa uTha

lazzat-e-sham yahan KHwab-e-sahar mein aai

zindagi kuchh hai 'ata' sher-o-adab hai kuchh aur

ye do-rangi ki waba kaisi hunar mein aai