Tis ek uTThe badan mein jwar palna chahiye

Tiis ik uTThe badan meñ jvaar palnā chāhiye

aap ke siine meñ ik sañgrām chalnā chāhiye

ham banā.eñge dobāra sone kī chiḌiyā ise

is na.ī ummīd kā sūraj nikalnā chāhiye

ai siyāsat ho mubārak tū ne ye batlā diyā

bhaa.ī ko bhaa.ī se kaise duur chalnā chāhiye

kyā kahā tum ne tumheñ ye rañg bhāyā hī nahīñ

tum musavvir ho tumheñ har rañg phalnā chāhiye

thī shahīdān-e-vatan kī ik zarā sī aarzū

aur vo thī desh ko aage nikalnā chāhiye

ab to lagtā hai ki ham ne koshisheñ be-kār kiiñ

apnī zid ye thī ki har sāñche meñ Dhalnā chāhiye

phir vahī pāchak kī golī ber vo jāmun ke din

kyā tumheñ lagtā nahīñ bachpan meñ chalnā chāhiye

ik diyā ho jis meñ ilm-o-dīñ hunar kā tel ho

ho charāġh aisā to phir ghar ghar meñ jalnā chāhiye

Tis ek uTThe badan mein jwar palna chahiye

aap ke sine mein ek sangram chalna chahiye

hum banaenge dobara sone ki chiDiya ise

is nai ummid ka suraj nikalna chahiye

ai siyasat ho mubarak tu ne ye batla diya

bhai ko bhai se kaise dur chalna chahiye

kya kaha tum ne tumhein ye rang bhaya hi nahin

tum musawwir ho tumhein har rang phalna chahiye

thi shahidan-e-watan ki ek zara si aarzu

aur wo thi desh ko aage nikalna chahiye

ab to lagta hai ki hum ne koshishen be-kar kin

apni zid ye thi ki har sanche mein Dhalna chahiye

phir wahi pachak ki goli ber wo jamun ke din

kya tumhein lagta nahin bachpan mein chalna chahiye

ek diya ho jis mein ilm-o-din hunar ka tel ho

ho charagh aisa to phir ghar ghar mein jalna chahiye