tilism-e-hosh-ruba mein patang uDti hai

tilism-e-hosh-rubā meñ patañg uḌtī hai

kisī aqab kī havā meñ patañg uḌtī hai

chaḌhe haiñ kāTne vāloñ pe lūTne vaale

isī hujūm-e-balā maiñ patañg uḌtī hai

patañg uḌāne se kyā man.a kar sake zāhid

ki us kī apnī abā meñ patañg uḌtī hai

ye aap kaTtī hai yā kāTtī hai dūsrī ko

bas ek bīm-o-rajā meñ patañg uḌtī hai

kahīñ chhatoñ pe bapā hai basant kā tyauhār

kahīñ pe tañgī-e-jā meñ patañg uḌtī hai

kahīñ falak pe saraktī hai sarsarātī huī

kahīñ diloñ kī fazā meñ patañg uḌtī hai

khulā hai is pe kuchh aise bahār kā mausam

hai ruḳh pe rañg qabā meñ patañg uḌtī hai

ye ḳhvāb hai ki ulajhtā hai aur ḳhvāboñ se

ye chāñd hai ki ḳhalā meñ patañg uḌtī hai

umīd-e-vasl meñ so jaa.eñ ham kabhī jo 'zafar'

to apnī ḳhvāb-sarā meñ patañg uḌtī hai

tilism-e-hosh-ruba mein patang uDti hai

kisi aqab ki hawa mein patang uDti hai

chaDhe hain kaTne walon pe luTne wale

isi hujum-e-bala main patang uDti hai

patang uDane se kya mana kar sake zahid

ki us ki apni aba mein patang uDti hai

ye aap kaTti hai ya kaTti hai dusri ko

bas ek bim-o-raja mein patang uDti hai

kahin chhaton pe bapa hai basant ka tyauhaar

kahin pe tangi-e-ja mein patang uDti hai

kahin falak pe sarakti hai sarsaraati hui

kahin dilon ki faza mein patang uDti hai

khula hai is pe kuchh aise bahaar ka mausam

hai ruKH pe rang qaba mein patang uDti hai

ye KHwab hai ki ulajhta hai aur KHwabon se

ye chand hai ki KHala mein patang uDti hai

umid-e-wasl mein so jaen hum kabhi jo 'zafar'

to apni KHwab-sara mein patang uDti hai