tera firaq KHizan mein mile to achchha ho

tirā firāq ḳhizāñ meñ mile to achchhā ho

maiñ chāhtā huuñ udāsī kā rang gahrā ho

badan kī samt bhī niklo kabhī ki mumkin hai

tumheñ talāsh hai jis kī yahī vo rasta ho

rutoñ ke ramz kabhī munkashif bhī hoñ ham par

dhanak-shanās hoñ ham zaat meñ izāfa ho

ham apnī raushnī se ḳhud bahut pashemāñ haiñ

havā gale se lagā le to ḳhatm qissa ho

baḌā hasīn-o-dil-āvez hai ye shahr tirā

magar vo shaḳhs ki jis ko udaas rahnā ho

tamām ḳhadshe hamāre ġhalat nikal aa.eñ

ḳhudā kare ye ḳhalā kahkashāñ meñ khultā ho

ye āsmāñ mujhe is tarh dekhtā hai 'rāz'

ki jaise maiñ ne kabhī is kā kuchh bigāḌā ho

tera firaq KHizan mein mile to achchha ho

main chahta hun udasi ka rang gahra ho

badan ki samt bhi niklo kabhi ki mumkin hai

tumhein talash hai jis ki yahi wo rasta ho

ruton ke ramz kabhi munkashif bhi hon hum par

dhanak-shanas hon hum zat mein izafa ho

hum apni raushni se KHud bahut pasheman hain

hawa gale se laga le to KHatm qissa ho

baDa hasin-o-dil-awez hai ye shahr tera

magar wo shaKHs ki jis ko udas rahna ho

tamam KHadshe hamare ghalat nikal aaen

KHuda kare ye KHala kahkashan mein khulta ho

ye aasman mujhe is tarh dekhta hai 'raaz'

ki jaise main ne kabhi is ka kuchh bigaDa ho