tera KHayal ki KHwabon mein jin se hai KHushbu

tirā ḳhayāl ki ḳhvāboñ meñ jin se hai ḳhushbū

vo ḳhvāb jin meñ mirā paikar-e-ḳhayāl hai tū

satā rahī haiñ mujhe bachpane kī kuchh yādeñ

vo garmiyoñ ke shab-o-roz dopahar kī vo lū

pachās saal kī yādoñ ke naqsh aur naqshe

vo koī nisf sadī qabl kā zamāna-e-hū

vo garm-o-ḳhushk mahīne vo jeTh vo baisākh

ki hāfize meñ kabhī aah haiñ kabhī aañsū

vo zaa.eñ zaa.eñ ke kitne muhīb zanāTe?

fazā kā haul havā kī vo vahshateñ har sū

vo saa.eñ saa.eñ ke kitne ajiib sannāTe?

vo sansanī vo pur-asrār ek ālam-e-hū

vo dopahar vo habūḌe vo señgī baa.ī kuuT

fazā-e-sho.ala-bajān o havā-e-ātish-e-ḳhū

vo khiḌkiyoñ meñ havāoñ kī sar-kashī tundī

vo bām-o-dar pe musallat jahannamī jaadū

vo pech-o-tāb bagūloñ kā mere āñgan maiñ

chuḌeleñ ghar meñ ghus aa.ī haiñ khaul kar gesū

vo lū kā zor ki saare kivāḌ bajte haiñ

ki jaise lashkar-e-jinnāt kā amal har sū

vo shor jaise bagūloñ meñ bhuut hoñ raqsāñ

vo qāh-qāh vo hā-hā vo hoñk vo hū-hū

guzar rahā hai tasavvur se jeTh kā mausam

aur is samay meñ mujhe yaad aa rahā hai tū

tera KHayal ki KHwabon mein jin se hai KHushbu

wo KHwab jin mein mera paikar-e-KHayal hai tu

sata rahi hain mujhe bachpane ki kuchh yaaden

wo garmiyon ke shab-o-roz dopahar ki wo lu

pachas sal ki yaadon ke naqsh aur naqshe

wo koi nisf sadi qabl ka zamana-e-hu

wo garm-o-KHushk mahine wo jeTh wo baisakh

ki hafize mein kabhi aah hain kabhi aansu

wo zaen zaen ke kitne muhib zanaTe?

faza ka haul hawa ki wo wahshaten har su

wo saen saen ke kitne ajib sannaTe?

wo sansani wo pur-asrar ek aalam-e-hu

wo dopahar wo habuDe wo sengi bai kuT

faza-e-shoala-bajaan o hawa-e-atish-e-KHu

wo khiDkiyon mein hawaon ki sar-kashi tundi

wo baam-o-dar pe musallat jahannami jadu

wo pech-o-tab bagulon ka mere aangan main

chuDelen ghar mein ghus aai hain khaul kar gesu

wo lu ka zor ki sare kiwaD bajte hain

ki jaise lashkar-e-jinnat ka amal har su

wo shor jaise bagulon mein bhut hon raqsan

wo qah-qah wo ha-ha wo honk wo hu-hu

guzar raha hai tasawwur se jeTh ka mausam

aur is samay mein mujhe yaad aa raha hai tu