tera wajud teri shaKHsiyat kahani kya

tirā vajūd tirī shaḳhsiyat kahānī kyā

kisī ke kaam na aa.e to zindagānī kyā

havas hai jism kī āñkhoñ se pyaar ġhā.eb hai

badal ga.e haiñ sabhī ishq ke ma.ānī kyā

azal se jaarī hai tā hashr hī chalegā safar

samay ke sāmne dariyāoñ kī ravānī kyā

ye māntā huuñ maiñ mehmāñ ḳhudā kī rahmat hai

ke tum ne dekhī nahīñ merī mezbānī kyā

ḳhumār-e-ishq bhī utregā roz-e-vasl ke baad

rahegī apnī bhalā umr bhar javānī kyā

binā laḌe hī jo tū mushkiloñ se haarā hai

ragoñ meñ terī lahū ban gayā hai paanī kyā

ḳhushī kī chaah meñ kuchh ġham uThāne paḌte haiñ

guloñ kī ḳhaar nahīñ karte pāsbānī kyā

tera wajud teri shaKHsiyat kahani kya

kisi ke kaam na aae to zindagani kya

hawas hai jism ki aankhon se pyar ghaeb hai

badal gae hain sabhi ishq ke maani kya

azal se jari hai ta hashr hi chalega safar

samay ke samne dariyaon ki rawani kya

ye manta hun main mehman KHuda ki rahmat hai

ke tum ne dekhi nahin meri mezbani kya

KHumar-e-ishq bhi utrega roz-e-wasl ke baad

rahegi apni bhala umr bhar jawani kya

bina laDe hi jo tu mushkilon se haara hai

ragon mein teri lahu ban gaya hai pani kya

KHushi ki chah mein kuchh gham uThane paDte hain

gulon ki KHar nahin karte pasbani kya