tere baghair main kitna hun be-qarar na puchh

tire baġhair maiñ kitnā huuñ be-qarār na pūchh

bahār-e-gulshan-e-ulfat kā hāl-e-zār na pūchh

gayā hai mere mohalla se jab se badr-e-munīr

hai chashm-e-qalb-e-hazīñ kaisī zaar zaar na pūchh

firāq-e-yār meñ bistar kī ġhair hālat hai

hai kitnā bālish-e-maḳhmal bhī sogvār na pūchh

shikasta qalb pe lagtī hai choT ai hamdam

guzar rahī hai jo dil par vo baar baar na pūchh

nikāl pheñkā hai yādoñ kī laash ko dil se

kahāñ banegā tamannāoñ kā mazār na pūchh

tabīb samjhā thā jis ko thā āstīn kā saañp

shikasta kitnā huā jām-e-e'tibār na pūchh

nashāt-o-aish meñ hamdam hazār milte the

dukhoñ meñ kaun thā sāthī na pūchh yaar na pūchh

jahāñ pe sham-e-falak hai vahīñ pe parvāna

talāsh kar mirī mahfil mirā dayār na pūchh

tere baghair main kitna hun be-qarar na puchh

bahaar-e-gulshan-e-ulfat ka haal-e-zar na puchh

gaya hai mere mohalla se jab se badr-e-munir

hai chashm-e-qalb-e-hazin kaisi zar zar na puchh

firaq-e-yar mein bistar ki ghair haalat hai

hai kitna baalish-e-maKHmal bhi sogwar na puchh

shikasta qalb pe lagti hai choT ai hamdam

guzar rahi hai jo dil par wo bar bar na puchh

nikal phenka hai yaadon ki lash ko dil se

kahan banega tamannaon ka mazar na puchh

tabib samjha tha jis ko tha aastin ka sanp

shikasta kitna hua jam-e-e'tibar na puchh

nashat-o-aish mein hamdam hazar milte the

dukhon mein kaun tha sathi na puchh yar na puchh

jahan pe sham-e-falak hai wahin pe parwana

talash kar meri mahfil mera dayar na puchh