tere didar ki KHatir mah-o-aKHtar jage

tire dīdār kī ḳhātir mah-o-aḳhtar jaage

ye parinde bhī tire hijr meñ aksar jaage

kahīñ jugnū kahīñ taare kahīñ manzar jaage

phir satāne ke liye mujh ko sitamgar jaage

apnī āñkhoñ meñ basā kar ġham-e-hijrāñ kī kasak

kaash tū bhī kabhī mere liye shab bhar jaage

aag aur ḳhuun ke dariyā ko ravānī dene

ḳhūgar-e-zulm jafā-kāroñ ke lashkar jaage

ḳhushbueñ jhuum uThīñ nuur kī barsāt huī

tere aane se bahāroñ ke muqaddar jaage

din kī dahlīz ho yā raat kā āñgan lekin

dil kī dhaḌkan hai ki har-vaqt barābar jaage

kuchh tumhīñ par nahīñ 'aḳhtar' shab-e-furqat kā asar

ham bhī āñkhoñ meñ liye ashkoñ ke kankar jaage

tere didar ki KHatir mah-o-aKHtar jage

ye parinde bhi tere hijr mein aksar jage

kahin jugnu kahin tare kahin manzar jage

phir satane ke liye mujh ko sitamgar jage

apni aankhon mein basa kar gham-e-hijran ki kasak

kash tu bhi kabhi mere liye shab bhar jage

aag aur KHun ke dariya ko rawani dene

KHugar-e-zulm jafa-karon ke lashkar jage

KHushbuen jhum uThin nur ki barsat hui

tere aane se bahaaron ke muqaddar jage

din ki dahliz ho ya raat ka aangan lekin

dil ki dhaDkan hai ki har-waqt barabar jage

kuchh tumhin par nahin 'aKHtar' shab-e-furqat ka asar

hum bhi aankhon mein liye ashkon ke kankar jage