tere diwane har rang rahe tere dhyan ki jot jagae hue

tire dīvāne har rañg rahe tire dhyān kī jot jagā.e hue

kabhī nithre suthre kapḌoñ meñ kabhī añg bhabhūt ramā.e hue

us raah se chhup chhup kar guzrī rut sabz sunahre phūloñ kī

jis raah pe tum kabhī nikle the ghabrā.e hue sharmā.e hue

ab tak hai vahī aalam dil kā vahī rañg-e-shafaq vahī tez havā

vahī saarā manzar jaadū kā mere nain se nain milā.e hue

chehre pe chamak āñkhoñ meñ hayā lab garm ḳhunuk chhab narm navā

jinheñ itne sukūn meñ dekhā thā vahī aaj mile ghabrā.e hue

ham ne 'mushtāq' yuuñ hī kholā yādoñ kī kitāb-e-muqaddas ko

kuchh kāġhaz nikle ḳhasta se kuchh phuul mile murjhā.e hue

tere diwane har rang rahe tere dhyan ki jot jagae hue

kabhi nithre suthre kapDon mein kabhi ang bhabhut ramae hue

us rah se chhup chhup kar guzri rut sabz sunahre phulon ki

jis rah pe tum kabhi nikle the ghabrae hue sharmae hue

ab tak hai wahi aalam dil ka wahi rang-e-shafaq wahi tez hawa

wahi sara manzar jadu ka mere nain se nain milae hue

chehre pe chamak aankhon mein haya lab garm KHunuk chhab narm nawa

jinhen itne sukun mein dekha tha wahi aaj mile ghabrae hue

hum ne 'mushtaq' yun hi khola yaadon ki kitab-e-muqaddas ko

kuchh kaghaz nikle KHasta se kuchh phul mile murjhae hue