tere dil mein bhi hain kuduraten tere lab pe bhi hain shikayaten

tire dil meñ bhī haiñ kudūrateñ tire lab pe bhī haiñ shikāyateñ

mire dostoñ kī navāzisheñ mire dushmanoñ kī ināyateñ

ye hai turfa sūrat-e-dostī ki nigāh-e-dil hama barf haiñ

na vo baada hai na vo zarf haiñ na vo harf haiñ na hikāyateñ

yahī rabt-o-zabt-e-ġham-o-alam tirī raa.e meñ kabhī ḳhuub the

vo yahī to mere uyuub the jinheñ dī ga.ī thiiñ ri.āyateñ

tire āstāñ se kashāñ kashāñ liye jā rahī haiñ kahāñ kahāñ

mire nāsehoñ kī hidāyateñ tire vā.izoñ kī rivāyateñ

tirā naam lete hī ai ḳhudā maiñ sanam-kade se nikal chukā

raheñ kaash tā-dar-e-mustafā mirī rahnumā tirī āyateñ

tere dil mein bhi hain kuduraten tere lab pe bhi hain shikayaten

mere doston ki nawazishen mere dushmanon ki inayaten

ye hai turfa surat-e-dosti ki nigah-e-dil hama barf hain

na wo baada hai na wo zarf hain na wo harf hain na hikayaten

yahi rabt-o-zabt-e-gham-o-alam teri rae mein kabhi KHub the

wo yahi to mere uyub the jinhen di gai thin riayaten

tere aastan se kashan kashan liye ja rahi hain kahan kahan

mere nasehon ki hidayaten tere waizon ki riwayaten

tera nam lete hi ai KHuda main sanam-kade se nikal chuka

rahen kash ta-dar-e-mustafa meri rahnuma teri aayaten