tere jamal se hum runuma nahin hue hain

tire jamāl se ham rūnumā nahīñ hue haiñ

chamak rahe haiñ magar aa.ina nahīñ hue haiñ

dhaḌak rahā hai tū ik ism kī hai ye barakat

vagarna vāqiye is dil meñ kyā nahīñ hue haiñ

batā na paa.eñ to ḳhud tum samajh hī jaao ki ham

bilā javāz to be-mājrā nahīñ hue haiñ

tirā kamāl ki āñkhoñ meñ kuchh zabān pe kuchh

hameñ to mo.ajize aise atā nahīñ hue haiñ

ye mat samajh ki koī tujh se munharif hī nahīñ

abhī ham ahl-e-junūñ lab-kushā nahīñ hue haiñ

ba-nām-e-zauq-e-suḳhan ḳhud-numā.ī aap kareñ

ham is maraz meñ abhī mubtalā nahīñ hue haiñ

hamī vo jin kā safar māvarā-e-vaqt-o-vajūd

hamī vo ḳhud se kabhī jo rihā nahīñ hue haiñ

ḳhud-āgahī bhī khaḌī māñgtī hai apnā hisāb

junūñ ke qarz bhī ab tak adā nahīñ hue haiñ

kisī ne dil jo dukhāyā kabhī to ham 'irfān'

udaas ho ga.e lekin ḳhafā nahīñ hue haiñ

tere jamal se hum runuma nahin hue hain

chamak rahe hain magar aaina nahin hue hain

dhaDak raha hai tu ek ism ki hai ye barakat

wagarna waqiye is dil mein kya nahin hue hain

bata na paen to KHud tum samajh hi jao ki hum

bila jawaz to be-majra nahin hue hain

tera kamal ki aankhon mein kuchh zaban pe kuchh

hamein to moajize aise ata nahin hue hain

ye mat samajh ki koi tujh se munharif hi nahin

abhi hum ahl-e-junun lab-kusha nahin hue hain

ba-nam-e-zauq-e-suKHan KHud-numai aap karen

hum is maraz mein abhi mubtala nahin hue hain

hami wo jin ka safar mawara-e-waqt-o-wajud

hami wo KHud se kabhi jo riha nahin hue hain

KHud-agahi bhi khaDi mangti hai apna hisab

junun ke qarz bhi ab tak ada nahin hue hain

kisi ne dil jo dukhaya kabhi to hum 'irfan'

udas ho gae lekin KHafa nahin hue hain