tere karam se KHudai mein yun to kya na mila

tire karam se ḳhudā.ī meñ yuuñ to kyā na milā

magar jo tū na milā ziist kā mazā na milā

hayāt-e-shauq kī ye garmiyāñ kahāñ hotīñ

ḳhudā kā shukr hameñ nāla-e-rasā na milā

azal se fitrat-e-āzād hī thī āvāra

ye kyuuñ kaheñ ki hameñ koī rahnumā na milā

ye kā.enāt kisī kā ġhubār-e-rāh sahī

dalīl-e-rāh jo bantā vo naqsh-e-pā na milā

ye dil shahīd-e-fareb-e-nigāh ho na sakā

vo laakh ham se ba-andāz-e-mahramāna milā

kanār-e-mauj meñ marnā to ham ko aatā hai

nishān-e-sāhil-e-ulfat milā milā na milā

tirī talāsh hī thī māya-e-baqā-e-vajūd

balā se ham ko sar-e-manzil-e-baqā na milā

tere karam se KHudai mein yun to kya na mila

magar jo tu na mila zist ka maza na mila

hayat-e-shauq ki ye garmiyan kahan hotin

KHuda ka shukr hamein nala-e-rasa na mila

azal se fitrat-e-azad hi thi aawara

ye kyun kahen ki hamein koi rahnuma na mila

ye kaenat kisi ka ghubar-e-rah sahi

dalil-e-rah jo banta wo naqsh-e-pa na mila

ye dil shahid-e-fareb-e-nigah ho na saka

wo lakh hum se ba-andaz-e-mahramana mila

kanar-e-mauj mein marna to hum ko aata hai

nishan-e-sahil-e-ulfat mila mila na mila

teri talash hi thi maya-e-baqa-e-wajud

bala se hum ko sar-e-manzil-e-baqa na mila