tere KHayal ka kuchh bhi pata nahin paDta

tire ḳhayāl kā kuchh bhī pata nahīñ paḌtā

yahāñ to chāroñ taraf dā.era nahīñ paḌtā

ham ehtiyāt se ḳhvāboñ ko maar dete agar

hamārī aañkh meñ ye aabla nahīñ paḌtā

ajiib raah paḌī hai ki is ke aage ab

kisī bhī samt koī rāsta nahīñ paḌtā

hamāre ḳhvāb kī ta.abīr ho ga.ī hotī

kisī meñ aur koī sochnā nahīñ paḌtā

vo rāh-e-ishq meñ dāḳhil nahīñ hue hoñge

jo bolte haiñ vahāñ hādisa nahīñ paḌtā

girah to roz hī paḌ jaatī hai ḳhayāloñ meñ

mire mizāj kā par zāviya nahīñ paḌtā

tamām umr tumhīñ tum likhe ga.e hote

hamārī soch meñ gar hāshiya nahīñ paḌtā

tere KHayal ka kuchh bhi pata nahin paDta

yahan to chaaron taraf daera nahin paDta

hum ehtiyat se KHwabon ko mar dete agar

hamari aankh mein ye aabla nahin paDta

ajib rah paDi hai ki is ke aage ab

kisi bhi samt koi rasta nahin paDta

hamare KHwab ki tabir ho gai hoti

kisi mein aur koi sochna nahin paDta

wo rah-e-ishq mein daKHil nahin hue honge

jo bolte hain wahan hadisa nahin paDta

girah to roz hi paD jati hai KHayalon mein

mere mizaj ka par zawiya nahin paDta

tamam umr tumhin tum likhe gae hote

hamari soch mein gar hashiya nahin paDta