tere KHayal teri aarzu se dur rahe

tire ḳhayāl tirī aarzū se duur rahe

navāb ho ke bhī ham lucknow se duur rahe

badan ke zaḳhm to chāragaroñ ne sī Daale

magar ye ruuh ke chhāle rafū se duur rahe

zamīñ pe Tapkā to ye inqalāb lā.egā

use batā do, vo mere lahū se duur rahe

kiyā hai ham ne tayammum bhī ḳhāk-e-maqtal par

namāz-e-ishq paḌhī aur vuzū se duur rahe

mirī zabān kā charchā thā āsmānoñ par

zamīn vaale mirī guftugū se duur rahe

tere KHayal teri aarzu se dur rahe

nawab ho ke bhi hum lucknow se dur rahe

badan ke zaKHm to chaaragaron ne si Dale

magar ye ruh ke chhaale rafu se dur rahe

zamin pe Tapka to ye inqalab laega

use bata do, wo mere lahu se dur rahe

kiya hai hum ne tayammum bhi KHak-e-maqtal par

namaz-e-ishq paDhi aur wuzu se dur rahe

meri zaban ka charcha tha aasmanon par

zamin wale meri guftugu se dur rahe