tere yaqin ke qabil agar nahin to na ho

tire yaqīn ke qābil agar nahīñ to na ho

jo dāstān-e-vafā mo'atabar nahīñ to na ho

hazār rañj uThā kar bhī muskurā.eñge

hayāt-e-ishq agar muḳhtasar nahīñ to na ho

bahār aa.e to kyūñ-kar qafas meñ chain paḌe

agar kisī ko ġham-e-bāl-o-par nahīñ to na ho

ab uTh ke jaa.eñ kahāñ but-kade kī raah haiñ ham

ye rāsta bhī tirī rahguzar nahīñ to na ho

ġham-e-hayāt kā shikva bhī kuchh nahīñ hai mujhe

jo mere haal kī un ko ḳhabar nahīñ to na ho

unheñ maiñ va.ada-farāmosh kah nahīñ saktā

madār-e-zīst is ummīd par nahīñ to na ho

mujhe to manzil-e-maqsūd tak pahuñchnā hai

rah-e-vafā meñ koī ham-safar nahīñ to na ho

nahīñ hai naaz mujhe apnī sher-goī par

mire kalām meñ fikr-o-nazar nahīñ to na ho

naved-e-marg mubārak ḳhushā ye hijr kī raat

mire nasīb meñ 'nudrat' sahar nahīñ to na ho

tere yaqin ke qabil agar nahin to na ho

jo dastan-e-wafa mo'atabar nahin to na ho

hazar ranj uTha kar bhi muskuraenge

hayat-e-ishq agar muKHtasar nahin to na ho

bahaar aae to kyun-kar qafas mein chain paDe

agar kisi ko gham-e-baal-o-par nahin to na ho

ab uTh ke jaen kahan but-kade ki rah hain hum

ye rasta bhi teri rahguzar nahin to na ho

gham-e-hayat ka shikwa bhi kuchh nahin hai mujhe

jo mere haal ki un ko KHabar nahin to na ho

unhen main wada-faramosh kah nahin sakta

madar-e-zist is ummid par nahin to na ho

mujhe to manzil-e-maqsud tak pahunchna hai

rah-e-wafa mein koi ham-safar nahin to na ho

nahin hai naz mujhe apni sher-goi par

mere kalam mein fikr-o-nazar nahin to na ho

nawed-e-marg mubarak KHusha ye hijr ki raat

mere nasib mein 'nudrat' sahar nahin to na ho