tere zauq-e-bandagi ka rahe motarif zamana

tire zauq-e-bandagī kā rahe mo'tarif zamāna

use sajda kar ke 'nudrat' kabhī hosh meñ na aanā

vo sujūd-e-shauq-e-paiham vo kisī kā āstāna

vahī DhūñDhtī haiñ āñkheñ jo guzar gayā zamāna

tire saath maiñ haram meñ tire saath but-kade meñ

na kahīñ qarār tujh ko na kahīñ mirā Thikānā

maiñ use adā karūñgā jo hai farz-e-ishq mujh par

magar apne 'ahd-o-paimāñ kahīñ tum na bhuul jaanā

ye chaman kī dil-farebī ye mushāhide kī duniyā

ye guloñ meñ rang ban kar tire husn kā samānā

ye adā-e-dil-shikan bhī mujhe hai umīd-afzā

mirā hāl-e-ġham sunānā tirā sun ke muskurānā

mujhe daad de na kyūñkar mirī himmat-e-asīrī

ki tamām 'umr samjhā maiñ qafas ko āshiyāna

ba-juz is ke kuchh nahīñ hai mirī zindagī kā hāsil

tirā dard dil meñ rakhnā tire ġham se lutf uThānā

vahīñ āsmāñ se 'nudrat' gire barq ik achānak

jo karūñ maiñ ye tasavvur ki qafas hai āshiyāna

tere zauq-e-bandagi ka rahe mo'tarif zamana

use sajda kar ke 'nudrat' kabhi hosh mein na aana

wo sujud-e-shauq-e-paiham wo kisi ka aastana

wahi DhunDhti hain aankhen jo guzar gaya zamana

tere sath main haram mein tere sath but-kade mein

na kahin qarar tujh ko na kahin mera Thikana

main use ada karunga jo hai farz-e-ishq mujh par

magar apne 'ahd-o-paiman kahin tum na bhul jaana

ye chaman ki dil-farebi ye mushahide ki duniya

ye gulon mein rang ban kar tere husn ka samana

ye ada-e-dil-shikan bhi mujhe hai umid-afza

mera haal-e-gham sunana tera sun ke muskurana

mujhe dad de na kyunkar meri himmat-e-asiri

ki tamam 'umr samjha main qafas ko aashiyana

ba-juz is ke kuchh nahin hai meri zindagi ka hasil

tera dard dil mein rakhna tere gham se lutf uThana

wahin aasman se 'nudrat' gire barq ek achanak

jo karun main ye tasawwur ki qafas hai aashiyana