teri aankhon se main KHud par ayan hone laga tha

tirī āñkhoñ se maiñ ḳhud par ayaañ hone lagā thā

mujhe bhī apne hone kā gumāñ hone lagā thā

maiñ apnī zaat kā sahrā jo tere paas laayā

mire andar bhī bārish kā samāñ hone lagā thā

'atā mujh ko huī sad-shukr thoḌī sī udāsī

vagarna muft meñ jī kā ziyāñ hone lagā thā

kahāñ jaate mirī āñkhoñ se ye aañsū nikal kar

darīda-dāmanī kā imtihāñ hone lagā thā

sarāpā gosh ho kar jo mujhe suntā thā pahroñ

mirā lahja bhī ab us par girāñ hone lagā thā

judā.ī kī ghaḌī se peshtar se rang-e-mausam

phir us ke baa'd har manzar dhuāñ hone lagā thā

teri aankhon se main KHud par ayan hone laga tha

mujhe bhi apne hone ka guman hone laga tha

main apni zat ka sahra jo tere pas laya

mere andar bhi barish ka saman hone laga tha

'ata mujh ko hui sad-shukr thoDi si udasi

wagarna muft mein ji ka ziyan hone laga tha

kahan jate meri aankhon se ye aansu nikal kar

darida-damani ka imtihan hone laga tha

sarapa gosh ho kar jo mujhe sunta tha pahron

mera lahja bhi ab us par giran hone laga tha

judai ki ghaDi se peshtar se rang-e-mausam

phir us ke ba'd har manzar dhuan hone laga tha