teri aawaz dhimi ho rahi hai

tirī āvāz dhīmī ho rahī hai

koī dīvār ūñchī ho rahī hai

ḳhudā par māthāpachchī ho rahī hai

usī se har taraqqī ho rahī hai

tirī āñkheñ batātī haiñ kahīñ se

mirī tā.īd jaarī ho rahī hai

vo hotel thā vahāñ par kaun kahtā

suno jī chaa.e ThanDī ho rahī hai

balā kī bhiiḌ hai us kī galī meñ

taraf-dāroñ kī gintī ho rahī hai

havā ḳhushbū uḌā laa.ī hai us kī

guloñ meñ chhīnā-jhapTī ho rahī hai

girā hai aañkh meñ bas ek zarra

magar taklīf kitnī ho rahī hai

fazā achchhī nahīñ hai bazm-e-dil kī

ġhamoñ meñ kānā-phūsī ho rahī hai

koī chaltā nahīñ rāh-e-ḳhudā par

zabānī jī-huzūrī ho rahī hai

teri aawaz dhimi ho rahi hai

koi diwar unchi ho rahi hai

KHuda par mathapachchi ho rahi hai

usi se har taraqqi ho rahi hai

teri aankhen batati hain kahin se

meri taid jari ho rahi hai

wo hotel tha wahan par kaun kahta

suno ji chae ThanDi ho rahi hai

bala ki bhiD hai us ki gali mein

taraf-daron ki ginti ho rahi hai

hawa KHushbu uDa lai hai us ki

gulon mein chhina-jhapTi ho rahi hai

gira hai aankh mein bas ek zarra

magar taklif kitni ho rahi hai

faza achchhi nahin hai bazm-e-dil ki

ghamon mein kana-phusi ho rahi hai

koi chalta nahin rah-e-KHuda par

zabani ji-huzuri ho rahi hai