teri adaen hain kya aur teri KHu kya hai

tirī adā.eñ haiñ kyā aur terī ḳhū kyā hai

samajh sakā na koī aaj tak ki tū kyā hai

na terī khoj na apnī talāsh hai mujh ko

mirī nigāh ko phir shauq-e-justujū kyā hai

kahāñ kā husn kahāñ kī hai bazm-ārā.ī

ik aa.ine ke sivā mere rū-ba-rū kyā hai

kabhī hai dhuup kā sadma kabhī hai shaam kā ġham

sivā.e ġham ke zamāne meñ chār-sū kyā hai

uḌā ke hosh tamāsha banāyā jaatā hai

mujhe pata hai ki anjām-e-ārzū kyā hai

jo tere naam pe miT jaa.e hai vo dīvāna

tirī nazar meñ mohabbat kī aabrū kyā hai

isī vasīle ubhartā hai aks insāñ kā

shu.ūr-e-zāt kā partav hai guftugū kyā hai

mire vajūd se mānūs haiñ sabhī 'shāriq'

maiñ aadmī huuñ magar mujh meñ aisī ḳhū kyā hai

teri adaen hain kya aur teri KHu kya hai

samajh saka na koi aaj tak ki tu kya hai

na teri khoj na apni talash hai mujh ko

meri nigah ko phir shauq-e-justuju kya hai

kahan ka husn kahan ki hai bazm-arai

ek aaine ke siwa mere ru-ba-ru kya hai

kabhi hai dhup ka sadma kabhi hai sham ka gham

siwae gham ke zamane mein chaar-su kya hai

uDa ke hosh tamasha banaya jata hai

mujhe pata hai ki anjam-e-arzu kya hai

jo tere nam pe miT jae hai wo diwana

teri nazar mein mohabbat ki aabru kya hai

isi wasile ubharta hai aks insan ka

shuur-e-zat ka partaw hai guftugu kya hai

mere wajud se manus hain sabhi 'shaariq'

main aadmi hun magar mujh mein aisi KHu kya hai