teri ana sar-e-bazar chhin lete hain

tirī anā sar-e-bāzār chhīn lete haiñ

sināñ se ham tirī guftār chhīn lete haiñ

jo qaid karke pahnāte haiñ beḌiyāñ ham ko

ham un ke paañv se raftār chhīn lete haiñ

ye mo.ajiza hai hamārā ki ham sar-e-maqtal

hañsī ke vaar se talvār chhīn lete haiñ

tū jāntā nahīñ ham lahja-e-ḳhitābat se

tirī zabāñ sar-e-darbār chhīn lete haiñ

sipar banāte haiñ nāzuk gulū-e-ḳhushk ko ham

kamān-e-lab se hī ham dhaar chhīn lete haiñ

jahāñ meñ aaj ye sheva hai kam-tarīnoñ kā

sharīf logoñ kī dastār chhīn lete haiñ

ye ek talḳh haqīqat hai daur-e-hāzir kī

ḳhushī ġharīb kī zardār chhīn lete haiñ

teri ana sar-e-bazar chhin lete hain

sinan se hum teri guftar chhin lete hain

jo qaid karke pahnate hain beDiyan hum ko

hum un ke panw se raftar chhin lete hain

ye moajiza hai hamara ki hum sar-e-maqtal

hansi ke war se talwar chhin lete hain

tu jaanta nahin hum lahja-e-KHitabat se

teri zaban sar-e-darbar chhin lete hain

sipar banate hain nazuk gulu-e-KHushk ko hum

kaman-e-lab se hi hum dhaar chhin lete hain

jahan mein aaj ye shewa hai kam-tarinon ka

sharif logon ki dastar chhin lete hain

ye ek talKH haqiqat hai daur-e-hazir ki

KHushi gharib ki zardar chhin lete hain