teri chahaton ke KHayal mein kai hasraten bhi milin mujhe

tirī chāhatoñ ke ḳhayāl meñ ka.ī hasrateñ bhī milīñ mujhe

tujhe dekhne ke ḳhumār meñ ka.ī ādateñ bhī milīñ mujhe

hai ajab tarah kā mo.āmla kabhī zindagī ne jo dī sazā

to sitam ke saath mire ḳhudā baḌī rāhateñ bhī milīñ mujhe

haañ burā kisī kā nahīñ kiyā magar ek dard kī baat ye

ki bhalā kiyā to kiyā magar yahīñ tohmateñ bhī milīñ mujhe

mirī zindagī meñ to nafratoñ kī siyāh raat hī thī magar

kisī raushnī kī tarah sanam tirī ulfateñ bhī milīñ mujhe

jahāñ pattharoñ ke gavāh se kabhī sach ko jhuuT banā liyā

kabhī jhuuT sach meñ badal gayā vo adālateñ bhī milīñ mujhe

mire ham-nashīñ mire ham-navā mire ham-safar mire rāzdāñ

tire dil meñ pyaar ke sāth-sāth kudūrateñ bhī milīñ mujhe

teri chahaton ke KHayal mein kai hasraten bhi milin mujhe

tujhe dekhne ke KHumar mein kai aadaten bhi milin mujhe

hai ajab tarah ka moamla kabhi zindagi ne jo di saza

to sitam ke sath mere KHuda baDi rahaten bhi milin mujhe

han bura kisi ka nahin kiya magar ek dard ki baat ye

ki bhala kiya to kiya magar yahin tohmaten bhi milin mujhe

meri zindagi mein to nafraton ki siyah raat hi thi magar

kisi raushni ki tarah sanam teri ulfaten bhi milin mujhe

jahan pattharon ke gawah se kabhi sach ko jhuT bana liya

kabhi jhuT sach mein badal gaya wo adalaten bhi milin mujhe

mere ham-nashin mere ham-nawa mere ham-safar mere raazdan

tere dil mein pyar ke sath-sath kuduraten bhi milin mujhe