teri chashm-e-tar mein rawan-dawan gham-e-ishq ka jo malal hai

tirī chashm-e-tar meñ ravāñ-davāñ ġham-e-ishq kā jo malāl hai

ye hī ibtidā-e-firāq hai ye hī intihā-e-visāl hai

hai qarīb phir bhī hai ajnabī tū idhar nahīñ maiñ udhar nahīñ

kisī raah ke haiñ do samt ham maiñ junūb huuñ tū shumāl hai

mirī hālatoñ meñ nihāñ haiñ ab tirī justujū kī ḳharābiyāñ

na maiñ ġham-zada na maiñ shādmāñ mirā haal bhī koī haal hai

tū sitam kare to ināyateñ maiñ gilā karūñ to shikāyateñ

tirā har suḳhan vahī arsh kī merā bolnā bhī muhāl hai

vo burā kahe mujhe rāt-din ye razā hai us ke mizāj kī

use 'āfī' maiñ bhī burā kahūñ kahāñ mujh meñ itnī majāl hai

teri chashm-e-tar mein rawan-dawan gham-e-ishq ka jo malal hai

ye hi ibtida-e-firaq hai ye hi intiha-e-visal hai

hai qarib phir bhi hai ajnabi tu idhar nahin main udhar nahin

kisi rah ke hain do samt hum main junub hun tu shumal hai

meri haalaton mein nihan hain ab teri justuju ki KHarabiyan

na main gham-zada na main shadman mera haal bhi koi haal hai

tu sitam kare to inayaten main gila karun to shikayaten

tera har suKHan wahi arsh ki mera bolna bhi muhaal hai

wo bura kahe mujhe raat-din ye raza hai us ke mizaj ki

use 'afi' main bhi bura kahun kahan mujh mein itni majal hai