teri qudraton ka kamal hun mere kuza-gar

tirī qudratoñ kā kamāl huuñ mire kūza-gar

maiñ sarāpā husn-o-jamāl huuñ mire kūza-gar

mire pech-o-ḳham mire zāviyoñ meñ jhalak tirī

tire ḳhāl-o-ḳhad kī misāl huuñ mire kūza-gar

mujhe merī zaat ke hāshiyoñ meñ na qaid rakh

tirī 'azmatoñ kī misāl huuñ mire kūza-gar

tirī fikr ke hasīñ tāqchoñ meñ sajā huā

tirī ḳhalvatoñ kā ḳhayāl huuñ mire kūza-gar

kisī chaak kā kisī ḳhaak kā nahīñ mo'jiza

maiñ tirī nazar kā kamāl huuñ mire kūza-gar

maiñ tapā nahīñ maiñ jalā nahīñ kisī aag meñ

tirī hiddatoñ kā jalāl huuñ mire kūza-gar

jo machal rahī hai madhur sī chang-o-rabāb meñ

tire zamzamoñ kī vo taal huuñ mire kūza-gar

maiñ chaTaḳh gayā huuñ ki TūTne ke qarīb huuñ

zarā thaam ḳhasta-ḳhisāl huuñ mire kūza-gar

mujhe toḌ de yā bigāḌ de yā sañvār de

tire chaak hī kā manāl huuñ mire kūza-gar

mirī hai.ateñ na bigāḌ deñ mirī ḳhvāhisheñ

ki maiñ aap apnā vabāl huuñ mire kūza-gar

jo palaT ke soch meñ aa sakā na 'amar' kabhī

vahī bhūlā-bhaTkā ḳhayāl huuñ mire kūza-gar

teri qudraton ka kamal hun mere kuza-gar

main sarapa husn-o-jamal hun mere kuza-gar

mere pech-o-KHam mere zawiyon mein jhalak teri

tere KHal-o-KHad ki misal hun mere kuza-gar

mujhe meri zat ke hashiyon mein na qaid rakh

teri 'azmaton ki misal hun mere kuza-gar

teri fikr ke hasin taqchon mein saja hua

teri KHalwaton ka KHayal hun mere kuza-gar

kisi chaak ka kisi KHak ka nahin mo'jiza

main teri nazar ka kamal hun mere kuza-gar

main tapa nahin main jala nahin kisi aag mein

teri hiddaton ka jalal hun mere kuza-gar

jo machal rahi hai madhur si chang-o-rabab mein

tere zamzamon ki wo tal hun mere kuza-gar

main chaTaKH gaya hun ki TuTne ke qarib hun

zara tham KHasta-KHisal hun mere kuza-gar

mujhe toD de ya bigaD de ya sanwar de

tere chaak hi ka manal hun mere kuza-gar

meri haiaten na bigaD den meri KHwahishen

ki main aap apna wabaal hun mere kuza-gar

jo palaT ke soch mein aa saka na 'amar' kabhi

wahi bhula-bhaTka KHayal hun mere kuza-gar