teri talash mein jis waqt hum nikalte hain

tirī talāsh meñ jis vaqt ham nikalte haiñ

qadam bhī chalte haiñ naqsh-e-qadam bhī chalte haiñ

jo tund-o-tez havāoñ kā ruḳh badalte haiñ

jahāñ meñ sirf unhīñ ke charāġh jalte haiñ

isī liye mire armāñ nahīñ nikalte haiñ

ki tez dhuup meñ chalne se paañv jalte haiñ

sū-e-haram hī muḌeñ ham ye kyā zarūrī hai

tirī galī se ka.ī rāste nikalte haiñ

tumhārī sāzish-e-paiham ko maat de de kar

vo ek ham haiñ jo har baar bach nikalte haiñ

ham un ko DhūñDne nikle haiñ dekhiye kyā ho

ki jo nuqūsh-e-kaf-e-pā miTā ke chalte haiñ

uThā ke dosh pe 'aḳhtar' mohabbatoñ kī salīb

ham aaj husn ke bāzār meñ nikalte haiñ

teri talash mein jis waqt hum nikalte hain

qadam bhi chalte hain naqsh-e-qadam bhi chalte hain

jo tund-o-tez hawaon ka ruKH badalte hain

jahan mein sirf unhin ke charagh jalte hain

isi liye mere arman nahin nikalte hain

ki tez dhup mein chalne se panw jalte hain

su-e-haram hi muDen hum ye kya zaruri hai

teri gali se kai raste nikalte hain

tumhaari sazish-e-paiham ko mat de de kar

wo ek hum hain jo har bar bach nikalte hain

hum un ko DhunDne nikle hain dekhiye kya ho

ki jo nuqush-e-kaf-e-pa miTa ke chalte hain

uTha ke dosh pe 'aKHtar' mohabbaton ki salib

hum aaj husn ke bazar mein nikalte hain