teri talash mein jo KHud ko bhul aae the

tirī talāsh meñ jo ḳhud ko bhuul aa.e the

patā vo apnā kabhī DhūñDne na paa.e the

kise ḳhabar thī ki phūloñ meñ bhī hunar hai vahī

kis ehtiyāt se kāñToñ se bach ke aa.e the

vo be-hisī kā thā 'ālam zarā ḳhabar na huī

ki raushnī thī sar-e-rahguzar ki saa.e the

kināre duur bahut duur the tū majbūran

samundaroñ meñ hī logoñ ne ghar basā.e the

har ek buuñd ka.ī bijliyoñ kī hāmil thī

shadīd barkhā ne bastī ke ghar jalā.e the

ye kaise bojh chale aa.e phir se palkoñ par

ki ik zamāne pe ham aaj muskurā.e the

teri talash mein jo KHud ko bhul aae the

pata wo apna kabhi DhunDne na pae the

kise KHabar thi ki phulon mein bhi hunar hai wahi

kis ehtiyat se kanTon se bach ke aae the

wo be-hisi ka tha 'alam zara KHabar na hui

ki raushni thi sar-e-rahguzar ki sae the

kinare dur bahut dur the tu majburan

samundaron mein hi logon ne ghar basae the

har ek bund kai bijliyon ki hamil thi

shadid barkha ne basti ke ghar jalae the

ye kaise bojh chale aae phir se palkon par

ki ek zamane pe hum aaj muskurae the