teri yaad jo mere dil mein hai bas usi ki jalwagari rahi

tirī yaad jo mere dil meñ hai bas usī kī jalvagarī rahī

mirā ġham bhī tāza-ba-tāza hai mirī shāḳh-e-fan bhī harī rahī

maiñ ne apne parda-e-sher meñ tujhe is hunar se chhupā liyā

ki ġhazal kahī to har ik ġhazal tirī ḳhushbuoñ se bharī rahī

yahī zindagī mirī zindagī yahī zindagī mirī maut hai

tirī yaad ban ga.ī ik chhurī jo mire gale pe dharī rahī

tujhe shauq mere kalām se tujhe pyaar mere hunar se thā

tujhe apnā maiñ na banā sakī yahī merī be-hunarī rahī

maiñ farefta tere naaz par maiñ nisār tere niyāz par

tirī har adā meñ fareb thā mujhe jis kī be-ḳhabarī rahī

kabhī 'anjum' vo bhī din aa ga.e ki ḳhushī kī bazm sajā.eñge

ye tamannā jo mere dil meñ thī vo yūñhī dharī kī dharī rahī

teri yaad jo mere dil mein hai bas usi ki jalwagari rahi

mera gham bhi taza-ba-taza hai meri shaKH-e-fan bhi hari rahi

main ne apne parda-e-sher mein tujhe is hunar se chhupa liya

ki ghazal kahi to har ek ghazal teri KHushbuon se bhari rahi

yahi zindagi meri zindagi yahi zindagi meri maut hai

teri yaad ban gai ek chhuri jo mere gale pe dhari rahi

tujhe shauq mere kalam se tujhe pyar mere hunar se tha

tujhe apna main na bana saki yahi meri be-hunari rahi

main farefta tere naz par main nisar tere niyaz par

teri har ada mein fareb tha mujhe jis ki be-KHabari rahi

kabhi 'anjum' wo bhi din aa gae ki KHushi ki bazm sajaenge

ye tamanna jo mere dil mein thi wo yunhi dhari ki dhari rahi