tishnagi apni bujhane ke liye jab gae hain

tishnagī apnī bujhāne ke liye jab ga.e haiñ

dasht bechāre samundar ke tale dab ga.e haiñ

kuuch karne kī ghaḌī hai magar ai ham-safro

ham udhar jā nahīñ sakte jidhar sab ga.e haiñ

ġhair shāista-e-ādāb-e-mohabbat na sahī

ham tire hijr ke āzār meñ mar kab ga.e haiñ

ab koī aks hai sālim na kisī kā chehra

ā.īna-ḳhāne meñ kyā dekhne sāhab ga.e haiñ

koī rasta na milā ghar se nikal kar ham ko

ham usī ku-e-malāmat ko ga.e jab ga.e haiñ

terī auqāt hī kyā 'mid.hat-ul-aḳhtar' sun le

shahr ke shahr zamīnoñ ke tale dab ga.e haiñ

tishnagi apni bujhane ke liye jab gae hain

dasht bechaare samundar ke tale dab gae hain

kuch karne ki ghaDi hai magar ai ham-safro

hum udhar ja nahin sakte jidhar sab gae hain

ghair shaista-e-adab-e-mohabbat na sahi

hum tere hijr ke aazar mein mar kab gae hain

ab koi aks hai salim na kisi ka chehra

aaina-KHane mein kya dekhne sahab gae hain

koi rasta na mila ghar se nikal kar hum ko

hum usi ku-e-malamat ko gae jab gae hain

teri auqat hi kya 'midhat-ul-aKHtar' sun le

shahr ke shahr zaminon ke tale dab gae hain