titli kanwal gulab ki rangat mein paD gae

titlī kañval gulāb kī rangat meñ paḌ ga.e

jab se huzūr aap kī sohbat meñ paḌ ga.e

tum ko to hoshiyār samajhte the ham magar

tum ko ye kyā huā ki mohabbat meñ paḌ ga.e

ham is liye bhī aur taraqqī na kar sake

bhūle se chehre dekhe muravvat meñ paḌ ga.e

ḳhud ham ne apnā saath bahut duur tak diyā

āḳhir meñ ham bhī apnī zarūrat meñ paḌ ga.e

tum ne zarā sī baat ko jab tuul kar diyā

jitne bhī 'aql-mand the hairat meñ paḌ ga.e

jangal meñ koī aadmī aayā zarūr hai

kyoñ jānvar bhī buġhz-o-'adāvat meñ paḌ ga.e

us din se apne vāre-niyāre hī ho ga.e

jis din se tere kūcha-e-ulfat meñ paḌ ga.e

iz.hār-e-'ishq jab se kiyā hai zabān se

'kāshif' 'adīb' tum bhī qayāmat meñ paḌ ga.e

titli kanwal gulab ki rangat mein paD gae

jab se huzur aap ki sohbat mein paD gae

tum ko to hoshiyar samajhte the hum magar

tum ko ye kya hua ki mohabbat mein paD gae

hum is liye bhi aur taraqqi na kar sake

bhule se chehre dekhe murawwat mein paD gae

KHud hum ne apna sath bahut dur tak diya

aaKHir mein hum bhi apni zarurat mein paD gae

tum ne zara si baat ko jab tul kar diya

jitne bhi 'aql-mand the hairat mein paD gae

jangal mein koi aadmi aaya zarur hai

kyon jaanwar bhi bughz-o-'adawat mein paD gae

us din se apne ware-niyare hi ho gae

jis din se tere kucha-e-ulfat mein paD gae

izhaar-e-'ishq jab se kiya hai zaban se

'kashif' 'adib' tum bhi qayamat mein paD gae