to mil bhi jae to phir bhi tujhe talash karun

to mil bhī jaa.e to phir bhī tujhe talāsh karūñ

har ek daur meñ taḳhlīq-e-irti.āsh karūñ

maiñ faash ho hī chukā huuñ to kyā zarūrī hai?

ki apne saath tujhe bhī jahāñ meñ faash karūñ

surāġh-e-zīst mile reza reza insāñ ko

butān-e-asr ko kuchh aise paash paash karūñ

zamīñ ne qarz diyā mujh ko rizq kī sūrat

marūñ to kyuuñ na supurd us ke apnī laash karūñ

mujhe najāt mile tīra-kāriyoñ se kaash

maiñ nuur ugā.ūñ yahāñ raushnī ma.āsh karūñ

mirī baqā kā taqāzā hai jab bhī rut badle

maiñ jam.a az-sar-e-nau apnī qaash qaash karūñ

jadīd daur meñ rahte hue bhī ai 'rūhī'

hai aarzū ki na tark apnī būd-o-bāsh karūñ

to mil bhi jae to phir bhi tujhe talash karun

har ek daur mein taKHliq-e-irtiash karun

main fash ho hi chuka hun to kya zaruri hai?

ki apne sath tujhe bhi jahan mein fash karun

suragh-e-zist mile reza reza insan ko

butan-e-asr ko kuchh aise pash pash karun

zamin ne qarz diya mujh ko rizq ki surat

marun to kyun na supurd us ke apni lash karun

mujhe najat mile tira-kariyon se kash

main nur ugaun yahan raushni maash karun

meri baqa ka taqaza hai jab bhi rut badle

main jama az-sar-e-nau apni qash qash karun

jadid daur mein rahte hue bhi ai 'ruhi'

hai aarzu ki na tark apni bud-o-bash karun