tohmat-e-hasrat-e-parwaz na mujh par bandhe

tohmat-e-hasrat-e-parvāz na mujh par bāñdhe

vaj.h kyā khol ke sayyād ne phir par bāñdhe

bāġhbāñ ghaat meñ sayyād hamesha maujūd

āshiyāñ baaġh meñ bulbul kaho kyūñkar bāñdhe

jo chhurī dekh ke qassāb kī tharrāte the

shān-e-haq hai vahī ab phirte haiñ ḳhanjar bāñdhe

kal kiyā thā jo mire chāk-e-garebāñ meñ rafū

is ḳhatā par ga.e haiñ aaj rafū-gar bāñdhe

ho chukā thā jo mire tez-parī se āgāh

chust kar ke mire sayyād ne shahpar bāñdhe

sho.arā khā.eñge kyā kyā na abhī to dhoke

sarv bāñdhe koī us qad ko sanobar bāñdhe

mo'jiza lab tirā goyā kare ai rashk-e-kalīm

jo zabāñ sehr se ye chashm-e-fusūñ-gar bāñdhe

mutma.in baiTh tū sayyād na kar qaid-e-shadīd

huuñ maiñ pāband-e-mohabbat tirā be-par bāñdhe

bāġh-e-ālam meñ usī ke liye hai nashv-o-numā

sūrat-e-ġhuncha rahe gāñTh meñ jo zar bāñdhe

bosa māñgā jo shab-e-vasl to bolā hañs kar

kahīñ aisā na ho har roz kī tū kar bāñdhe

dil kī betābī se Tāñke mire sab TuuT ga.e

paTTī jarrāh kaho zaḳhm pe kyūñkar bāñdhe

le to jā.egā ḳhat-e-shauq magar rashk ye hai

āshiyāñ baam par us ke na kabūtar bāñdhe

ummatī kyā kareñ aljūa na chillā.eñ agar

bhuuk meñ jabki nabī peT pe patthar bāñdhe

iftirā karne meñ tūfān hai vo shoḳh-e-zarīf

tūtiyā taaza koī aur na mujh par bāñdhe

mujh sā mahram tire mahram kā na hogā koī

beshtar khol diye band aur aksar bāñdhe

dast-e-san.at se bane us ke agar tujh sā but

kyuuñ havā apnī ḳhudā.ī kī na aazar bāñdhe

shā'irī ke liye lāzim hai talāzum na chhuTe

la.al lab ko tire tū dāñtoñ ko gauhar bāñdhe

pā-e-raftār agar hote to chaltā-phirtā

'rind' murdā sā paḌā rahtā na yuuñ sar bāñdhe

tohmat-e-hasrat-e-parwaz na mujh par bandhe

wajh kya khol ke sayyaad ne phir par bandhe

baghban ghat mein sayyaad hamesha maujud

aashiyan bagh mein bulbul kaho kyunkar bandhe

jo chhuri dekh ke qassab ki tharraate the

shan-e-haq hai wahi ab phirte hain KHanjar bandhe

kal kiya tha jo mere chaak-e-gareban mein rafu

is KHata par gae hain aaj rafu-gar bandhe

ho chuka tha jo mere tez-pari se aagah

chust kar ke mere sayyaad ne shahpar bandhe

shoara khaenge kya kya na abhi to dhoke

sarw bandhe koi us qad ko sanobar bandhe

mo'jiza lab tera goya kare ai rashk-e-kalim

jo zaban sehr se ye chashm-e-fusun-gar bandhe

mutmain baiTh tu sayyaad na kar qaid-e-shadid

hun main paband-e-mohabbat tera be-par bandhe

bagh-e-alam mein usi ke liye hai nashw-o-numa

surat-e-ghuncha rahe ganTh mein jo zar bandhe

bosa manga jo shab-e-wasl to bola hans kar

kahin aisa na ho har roz ki tu kar bandhe

dil ki betabi se Tanke mere sab TuT gae

paTTi jarrah kaho zaKHm pe kyunkar bandhe

le to jaega KHat-e-shauq magar rashk ye hai

aashiyan baam par us ke na kabutar bandhe

ummati kya karen aljua na chillaen agar

bhuk mein jabki nabi peT pe patthar bandhe

iftira karne mein tufan hai wo shoKH-e-zarif

tutiya taza koi aur na mujh par bandhe

mujh sa mahram tere mahram ka na hoga koi

beshtar khol diye band aur aksar bandhe

dast-e-sanat se bane us ke agar tujh sa but

kyun hawa apni KHudai ki na aazar bandhe

sha'iri ke liye lazim hai talazum na chhuTe

lal lab ko tere tu danton ko gauhar bandhe

pa-e-raftar agar hote to chalta-phirta

'rind' murda sa paDa rahta na yun sar bandhe