tughyaniyon ka jitna ghurur aur baDh gaya

tuġhyāniyoñ kā jitnā ġhurūr aur baḌh gayā

utnā hī merā azm-e-ubūr aur baḌh gayā

ghabrā rahe the log ki bujh jā.egā charāġh

lekin havā-e-tez meñ nuur aur baḌh gayā

is vāqiye se pahle use jāntā thā kaun

muusā kī vajah se qad-e-tūr aur baḌh gayā

jitnā jakaḌ ke rakkhā thā sayyād ne unheñ

itnā hī kārvān-e-tuyūr aur baḌh gayā

kyā saath saath aaoge pūchhā jo dard ne

dil ne kahā janāb zarūr aur baḌh gayā

dil meñ dabā huā thā nasha ishq kā magar

un se milī nazar to surūr aur baḌh gayā

tughyaniyon ka jitna ghurur aur baDh gaya

utna hi mera azm-e-ubur aur baDh gaya

ghabra rahe the log ki bujh jaega charagh

lekin hawa-e-tez mein nur aur baDh gaya

is waqiye se pahle use jaanta tha kaun

musa ki wajah se qad-e-tur aur baDh gaya

jitna jakaD ke rakkha tha sayyaad ne unhen

itna hi karwan-e-tuyur aur baDh gaya

kya sath sath aaoge puchha jo dard ne

dil ne kaha janab zarur aur baDh gaya

dil mein daba hua tha nasha ishq ka magar

un se mili nazar to surur aur baDh gaya