tujh but ka hun main barhaman kartar ki saugand hai

tujh but kā huuñ maiñ barhaman kartār kī saugand hai

japtā huuñ maalā yaar kī zunnār kī saugand hai

bāñkā husn sun kar tirā ḳhūbāñ ne khāyā pech-o-tāb

ai nuk-palak tujh chehra-e-bal-dār kī saugand hai

ḳhūbāñ kī ḳhūbī hai ḳhizāñ terī bahār aañge sadā

'āshiq kuuñ ai gulfām tujh ruḳhsār kī saugand hai

rakhtā huuñ tujh suuñ chashm ye dil ai mah-e-nūr-e-nazar

aa ke ḳhabar ik roz mujh bīmār kī saugand hai

dariyā-e-vahdat meñ tire ai gauhar-e-yaktā-e-husn

paayā nahīñ saanī tirā sansār kī saugand hai

bin haar aa.e gul-ruḳhāñ tere gale paḌne katīñ

jiitā to baare husn ke mizmār kī saugand hai

sharmindagī suuñ jā chhupāyā quvvat apnī kaan meñ

sun kar dur-afsānī tirī guftār kī saugand hai

shamshīr-e-abrū bāñdh kar aayā sipāhī nain kā

do Tok dil haiñ āshiqāñ talvār kī saugand hai

sehn-e-chaman meñ gul-badan tan-zeb kiiñ tujh jaama kuuñ

nain sukh hai terā dekhnā dīdār kī saugand hai

tujh hijr meñ dil kī fuġhāñ suuñ aañkh na.iiñ lagtī kabhī

kamḳhvāb hai maḳhmal mirā shab-e-tār kī saugand hai

'ushshāq kuuñ ruḳhsat kiyā de paañ ḳhirad kā yaar ne

rotā hai nis din 'mubtalā' ghar-bār kī saugand hai

tujh but ka hun main barhaman kartar ki saugand hai

japta hun mala yar ki zunnar ki saugand hai

banka husn sun kar tera KHuban ne khaya pech-o-tab

ai nuk-palak tujh chehra-e-bal-dar ki saugand hai

KHuban ki KHubi hai KHizan teri bahaar aange sada

'ashiq kun ai gulfam tujh ruKHsar ki saugand hai

rakhta hun tujh sun chashm ye dil ai mah-e-nur-e-nazar

aa ke KHabar ek roz mujh bimar ki saugand hai

dariya-e-wahdat mein tere ai gauhar-e-yakta-e-husn

paya nahin sani tera sansar ki saugand hai

bin haar aae gul-ruKHan tere gale paDne katin

jita to bare husn ke mizmar ki saugand hai

sharmindagi sun ja chhupaya quwwat apni kan mein

sun kar dur-afsani teri guftar ki saugand hai

shamshir-e-abru bandh kar aaya sipahi nain ka

do Tok dil hain aashiqan talwar ki saugand hai

sehn-e-chaman mein gul-badan tan-zeb kin tujh jama kun

nain sukh hai tera dekhna didar ki saugand hai

tujh hijr mein dil ki fughan sun aankh nain lagti kabhi

kamKHwab hai maKHmal mera shab-e-tar ki saugand hai

'ushshaq kun ruKHsat kiya de pan KHirad ka yar ne

rota hai nis din 'mubtala' ghar-bar ki saugand hai