tujhko malum nahin kya mere gham-KHwar rakhi

tujh ko mā'lūm nahīñ kyā mire ġham-ḳhvār rakhī

ek 'arzī dar-e-ulfat pe ka.ī baar rakhī

tujh se milne kī tamanna thī magar kyā kartā

vaqt ne biich meñ bārūd kī dīvār rakhī

sar nigūñ thā ki koī dekh ke āvāz na de

'ishq ne aa ke mire sar pe hī dastār rakhī

saj rahī thī pas-e-taḳh.īl koī shoḳh ġhazal

ham ne kāġhaz pe tire naam kī takrār rakhī

nam bhī honā nahīñ dariyā se guzar jaanā bhī

tū ne ye shart bhī kyā soch ke ai yaar rakhī

vaj.h-e-rusvā.ī na ban jaa.e 'adāvat kal phir

us ne ġhusse ko piyā ham ne bhī talvār rakhī

ham ne us shāḳh-e-tamannā pe numū paayā hai

jis ne har rut meñ kahānī koī tayyār rakhī

izn thā ḳhāna-ba-doshoñ ko bhī goyā.ī kā

ham bhī mahfil meñ uThe ḳhvāhish-e-guftār rakhī

tujh ko ma'lum nahin kya mere gham-KHwar rakhi

ek 'arzi dar-e-ulfat pe kai bar rakhi

tujh se milne ki tamanna thi magar kya karta

waqt ne bich mein barud ki diwar rakhi

sar nigun tha ki koi dekh ke aawaz na de

'ishq ne aa ke mere sar pe hi dastar rakhi

saj rahi thi pas-e-taKHil koi shoKH ghazal

hum ne kaghaz pe tere nam ki takrar rakhi

nam bhi hona nahin dariya se guzar jaana bhi

tu ne ye shart bhi kya soch ke ai yar rakhi

wajh-e-ruswai na ban jae 'adawat kal phir

us ne ghusse ko piya hum ne bhi talwar rakhi

hum ne us shaKH-e-tamanna pe numu paya hai

jis ne har rut mein kahani koi tayyar rakhi

izn tha KHana-ba-doshon ko bhi goyai ka

hum bhi mahfil mein uThe KHwahish-e-guftar rakhi