tujhko mere qurb mein pa kar jalte hain diwane log

tujh ko mere qurb meñ pā kar jalte haiñ dīvāne log

mere tere naam se aksar gaḌhte haiñ afsāne log

aaj ḳhizāñ ke haath gulistāñ bech diye haiñ yāroñ ne

fasl-e-gul ko yaad kareñge dekh ke ye vīrāne log

logoñ kī tash.hīr ke Dar se ham ne milnā chhoḌ diyā

bhūlī-bisrī bāteñ le kar kahte haiñ afsāne log

maiñ ne tujh se pyaar kiyā thā maiñ ne tujh ko puujā thā

ulfat merī dekh na paa.e ulfat se begāne log

in ko pāgal kahne vaalo in kī kuchh tauqīr karo

raunaq-e-bazm-e-hastī meñ ye duniyā ke dīvāne log

un ko hai kab pyaar kisī se jo nafrat ke aadī haiñ

jaane kis miTTī se bane haiñ haa.e ye anjāne log

is duniyā meñ rah kar ham ne dekhā hai 'jāñbāz' yahī

vaqt paḌe to kar lete haiñ matlab ke yārāne log

tujh ko mere qurb mein pa kar jalte hain diwane log

mere tere nam se aksar gaDhte hain afsane log

aaj KHizan ke hath gulistan bech diye hain yaron ne

fasl-e-gul ko yaad karenge dekh ke ye virane log

logon ki tashhir ke Dar se hum ne milna chhoD diya

bhuli-bisri baaten le kar kahte hain afsane log

main ne tujh se pyar kiya tha main ne tujh ko puja tha

ulfat meri dekh na pae ulfat se begane log

in ko pagal kahne walo in ki kuchh tauqir karo

raunaq-e-bazm-e-hasti mein ye duniya ke diwane log

un ko hai kab pyar kisi se jo nafrat ke aadi hain

jaane kis miTTi se bane hain hae ye anjaane log

is duniya mein rah kar hum ne dekha hai 'jaanbaz' yahi

waqt paDe to kar lete hain matlab ke yarane log