tujhe dil mein basaenge tere hi KHwab dekhenge

tujhe dil meñ basā.eñge tire hī ḳhvāb dekheñge

miTeñge terī chāhat meñ vafā ke baab dekheñge

ye āñkheñ yaar ke dīdār kī pyāsī haiñ muddat se

vo aa.eñ baam par to jalva-e-mahtāb dekheñge

ḳhumār-e-ḳhud-parastī bhī kabhī utregā maujoñ kā

to phir ai qulzum-e-hastī tujhe pāyāb dekheñge

rasā.ī jo tirī mahfil talak ik baar ho jaa.e

tujhe nazdīk se ai gauhar-e-nāyāb dekheñge

sunā hai niiñd ke aalam meñ vo masrūr lagte haiñ

to phir ḳhvāboñ meñ us zālim ko mahv-e-ḳhvāb dekheñge

tire nām-o-nasab se kyā ġharaz ai dushman-e-jānāñ

mile zaḳhmoñ se fursat to tire alqāb dekheñge

koī mūsā-sifat aa kar Dubo.e zulm kā lashkar

tabhī ham aaj ke fir.aun ko ġharqāb dekheñ dekheñge

lab-e-sāhil se dekhe haiñ nazāre 'shād' maujoñ ke

junūn-o-shauq kī zid hai ki ab girdāb dekheñge

tujhe dil mein basaenge tere hi KHwab dekhenge

miTenge teri chahat mein wafa ke bab dekhenge

ye aankhen yar ke didar ki pyasi hain muddat se

wo aaen baam par to jalwa-e-mahtab dekhenge

KHumar-e-KHud-parasti bhi kabhi utrega maujon ka

to phir ai qulzum-e-hasti tujhe payab dekhenge

rasai jo teri mahfil talak ek bar ho jae

tujhe nazdik se ai gauhar-e-nayab dekhenge

suna hai nind ke aalam mein wo masrur lagte hain

to phir KHwabon mein us zalim ko mahw-e-KHwab dekhenge

tere nam-o-nasab se kya gharaz ai dushman-e-jaanan

mile zaKHmon se fursat to tere alqab dekhenge

koi musa-sifat aa kar Duboe zulm ka lashkar

tabhi hum aaj ke firaun ko gharqab dekhen dekhenge

lab-e-sahil se dekhe hain nazare 'shad' maujon ke

junun-o-shauq ki zid hai ki ab girdab dekhenge