tujhe kal hi se nahin be-kali na kuchh aaj hi se raha qalaq

tujhe kal hī se nahīñ be-kalī na kuchh aaj hī se rahā qalaq

tirī umr saarī yūñhī kaTī tū hamesha yūñhī jiyā 'qalaq'

huā dil ke jaane kā ab yaqīñ ki vo dard-e-bar meñ mare nahīñ

na vo iztirāb-e-qazā kahīñ na vo hashr-ḳhez balā 'qalaq'

mujhe hashr kar diyā baiThnā mujhe qahr ho gayā Thaharnā

hai basān-e-sabr gurez-pā nahīñ ġham-gusār mirā qalaq

unheñ naala karne kā rañj kyā unheñ aah bharne kā rañj kyā

unheñ mere marne kā rañj kyā unheñ mere jaane kā kyā qalaq

yahī rashk ne diye mashvare kabhī parda un kā na kholiye

mire jī hī jī meñ phirā kiye mire dil hī dil meñ rahā qalaq

na to ro.e ġhair na ghar rahe na shab-e-firāq meñ mar rahe

na vafā kare na sitam sahe na jafā huī na huā qalaq

na vo maiñ rahā na vo tū rahā na vo aarzū na vo mudda.ā

huā zindagī kā bhī faisla magar ek terā rahā qalaq

rahe laakh sadme nafas nafas jiye kyuuñ ki koī parā.e bas

shab-e-vasl marne kī thī havas shab-e-hijr jiine kā thā qalaq

nahīñ chain un ko bhī ek dam ki hai fikr-e-jaur kā ġham sā ġham

hue mujh pe roz na.e sitam rahā un ko roz nayā qalaq

kare rabt koī kisī se kyā ki uThā tarīq nibāh kā

na karegī tujh se vafā jafā na karegā mujh se vafā qalaq

maiñ jalā to sho.ale meñ josh thā jo huā maiñ ḳhaak hai zalzala

maiñ hazār shakl badal chukā pa kisī tarah na chhupā qalaq

nahīñ tere phirne kā kuchh gila ki zamāna saarā badal gayā

jo shab-e-visāl meñ chain thā vahī roz-e-hijr banā qalaq

vo hai iltifāt dam-e-sitam ki ziyāda is se nahīñ karam

mire chāk-e-dil kā rafū alam mire dard-e-jāñ kī davā qalaq

ga.e vaañ bhī par na ghaTā alam chhuTe sab se par na chhuTā alam

mire paas se na haTā alam mire saath se na Talā qalaq

abhī thā salā-e-zan-e-sabaq abhī thī kitāb-e-varaq-varaq

kabhī madrase meñ rahā 'qalaq' kabhī mai-kade meñ rahā 'qalaq'

tujhe kal hi se nahin be-kali na kuchh aaj hi se raha qalaq

teri umr sari yunhi kaTi tu hamesha yunhi jiya 'qalaq'

hua dil ke jaane ka ab yaqin ki wo dard-e-bar mein mare nahin

na wo iztirab-e-qaza kahin na wo hashr-KHez bala 'qalaq'

mujhe hashr kar diya baiThna mujhe qahr ho gaya Thaharna

hai basan-e-sabr gurez-pa nahin gham-gusar mera qalaq

unhen nala karne ka ranj kya unhen aah bharne ka ranj kya

unhen mere marne ka ranj kya unhen mere jaane ka kya qalaq

yahi rashk ne diye mashware kabhi parda un ka na kholiye

mere ji hi ji mein phira kiye mere dil hi dil mein raha qalaq

na to roe ghair na ghar rahe na shab-e-firaq mein mar rahe

na wafa kare na sitam sahe na jafa hui na hua qalaq

na wo main raha na wo tu raha na wo aarzu na wo muddaa

hua zindagi ka bhi faisla magar ek tera raha qalaq

rahe lakh sadme nafas nafas jiye kyun ki koi parae bas

shab-e-wasl marne ki thi hawas shab-e-hijr jine ka tha qalaq

nahin chain un ko bhi ek dam ki hai fikr-e-jaur ka gham sa gham

hue mujh pe roz nae sitam raha un ko roz naya qalaq

kare rabt koi kisi se kya ki uTha tariq nibah ka

na karegi tujh se wafa jafa na karega mujh se wafa qalaq

main jala to shoale mein josh tha jo hua main KHak hai zalzala

main hazar shakl badal chuka pa kisi tarah na chhupa qalaq

nahin tere phirne ka kuchh gila ki zamana sara badal gaya

jo shab-e-visal mein chain tha wahi roz-e-hijr bana qalaq

wo hai iltifat dam-e-sitam ki ziyaada is se nahin karam

mere chaak-e-dil ka rafu alam mere dard-e-jaan ki dawa qalaq

gae wan bhi par na ghaTa alam chhuTe sab se par na chhuTa alam

mere pas se na haTa alam mere sath se na Tala qalaq

abhi tha sala-e-zan-e-sabaq abhi thi kitab-e-waraq-waraq

kabhi madrase mein raha 'qalaq' kabhi mai-kade mein raha 'qalaq'