tujhe KHalq kahti hai KHud-numa tujhe humse kyun ye hijab hai

tujhe ḳhalq kahtī hai ḳhud-numā tujhe ham se kyuuñ ye hijāb hai

tirā jalva terā hai parda-dar tere ruḳh pe kyuuñ ye naqāb hai

tujhe husn māya-e-nāz hai dil-e-ḳhasta mahv-e-niyāz hai

kahūñ kyā ye qissa-e-rāz hai mirā ishq ḳhāna-ḳharāb hai

ye risāla ishq kā hai adaq tire ġhaur karne kā hai sabaq

kabhī dekh is ko varaq varaq mirā siina ġham kī kitāb hai

tirī jazb meñ hai rubūdgī tere sukr meñ hai ġhunūdgī

na ḳhabar shuhūd-o-vajūd kī na tarañg-e-mauj-e-sarāb hai

ye vahī hai 'sāqī'-e-shefta jo hai dil se terā farefta

ye hai terā banda gurīḳhta ki jo ḳhāksār-e-turāb hai

tujhe KHalq kahti hai KHud-numa tujhe hum se kyun ye hijab hai

tera jalwa tera hai parda-dar tere ruKH pe kyun ye naqab hai

tujhe husn maya-e-naz hai dil-e-KHasta mahw-e-niyaz hai

kahun kya ye qissa-e-raaz hai mera ishq KHana-KHarab hai

ye risala ishq ka hai adaq tere ghaur karne ka hai sabaq

kabhi dekh is ko waraq waraq mera sina gham ki kitab hai

teri jazb mein hai rubudgi tere sukr mein hai ghunudgi

na KHabar shuhud-o-wajud ki na tarang-e-mauj-e-sarab hai

ye wahi hai 'saqi'-e-shefta jo hai dil se tera farefta

ye hai tera banda guriKHta ki jo KHaksar-e-turab hai