tujhe kho kar mohabbat ko ziyaada kar liya maine

tujhe kho kar mohabbat ko ziyāda kar liyā maiñ ne

ye kis hairat meñ ā.īna kushāda kar liyā maiñ ne

mujhe pechīda jazboñ kī kahānī nazm karnā thī

so jitnā ho sakā uslūb saada kar liyā maiñ ne

mohabbat kā sunā thā zaat kī takmīl kartī hai

magar is aarzū meñ ḳhud ko aadhā kar liyā maiñ ne

shikast-e-ḳhvāb par hī ḳhvāb kī buniyād rakhnā thī

dar-e-imkān phir se īstāda kar liyā maiñ ne

na.ī rut meñ mohabbat kā i.aada chāhtā thā vo

purāne tajrabe se istifāda kar liyā maiñ ne

sar-e-sāhil mujhe pīchhe se ab āvāz mat denā

yahāñ se paar jaane kā irāda kar liyā maiñ ne

tujhe kho kar mohabbat ko ziyaada kar liya main ne

ye kis hairat mein aaina kushada kar liya main ne

mujhe pechida jazbon ki kahani nazm karna thi

so jitna ho saka uslub sada kar liya main ne

mohabbat ka suna tha zat ki takmil karti hai

magar is aarzu mein KHud ko aadha kar liya main ne

shikast-e-KHwab par hi KHwab ki buniyaad rakhna thi

dar-e-imkan phir se istada kar liya main ne

nai rut mein mohabbat ka iada chahta tha wo

purane tajrabe se istifada kar liya main ne

sar-e-sahil mujhe pichhe se ab aawaz mat dena

yahan se par jaane ka irada kar liya main ne