tujhe meri KHamoshi se bhi andaza nahin hota

tujhe merī ḳhamoshī se bhī andāza nahīñ hotā

ki maiñ ab sirf bātoñ se tar-o-tāza nahīñ hotā

tirā aanā bhī dekhegā tirā jaanā bhī har koī

mahal kī tarah ghar meñ chor-darvāza nahīñ hotā

natījoñ se bharī duniyā meñ paidā hone vāloñ kā

bharosa to bahut hotā hai ḳhamyāza nahīñ hotā

tirī āvāz bhārī hotī to suntā nahīñ koī

tire paañv nahīñ hote to āvāza nahīñ hotā

vo jis kī ek Thokar se hamārī ḳhaak uḌtī hai

usī ke paas gāloñ ke liye ġhāza nahīñ hotā

use in shā.iroñ se taaza phūloñ kī tavaqqo hai

ki jin kī shā.irī meñ sher bhī taaza nahīñ hotā

bichhaḌte vaqt ham donoñ kī hālat ek jaisī thī

bikharte vaqt jaise koī shīrāza nahīñ hotā

tujhe meri KHamoshi se bhi andaza nahin hota

ki main ab sirf baaton se tar-o-taza nahin hota

tera aana bhi dekhega tera jaana bhi har koi

mahal ki tarah ghar mein chor-darwaza nahin hota

natijon se bhari duniya mein paida hone walon ka

bharosa to bahut hota hai KHamyaza nahin hota

teri aawaz bhaari hoti to sunta nahin koi

tere panw nahin hote to aawaza nahin hota

wo jis ki ek Thokar se hamari KHak uDti hai

usi ke pas galon ke liye ghaza nahin hota

use in shairon se taza phulon ki tawaqqo hai

ki jin ki shairi mein sher bhi taza nahin hota

bichhaDte waqt hum donon ki haalat ek jaisi thi

bikharte waqt jaise koi shiraaza nahin hota