TukDa jahan gira jigar-e-chaak-chaak ka

TukḌā jahāñ girā jigar-e-chāk-chāk kā

yāqūt sā damakne lagā rañg ḳhaak kā

le jaate haiñ uThā ke malak us kī naash ko

ye martaba hai teġh-e-nigah ke halāk kā

ai bāġhbāñ na mujh se ho āzurda maiñ chalā

ik dam ḳhush aa gayā thā mujhe saaya taak kā

milne meñ kitne garm haiñ ye haa.e dekhiyo

kushta huuñ maiñ to shola-ruḳhoñ ke tapāk kā

ai shola apnī garm-ravī par na bhūliyo

aalam hai aur āh-e-dil-e-soz-nāk kā

aatā hai apne kushte kī turbat pe jab vo shoḳh

ik naara vaañ se nikle hai rūhī-fidāk kā

shukr-e-ḳhudā ki naam hai ismat kā 'mus.hafī'

roz-e-jazā gavāh mire ishq-e-pāk kā

TukDa jahan gira jigar-e-chaak-chaak ka

yaqut sa damakne laga rang KHak ka

le jate hain uTha ke malak us ki nash ko

ye martaba hai tegh-e-nigah ke halak ka

ai baghban na mujh se ho aazurda main chala

ek dam KHush aa gaya tha mujhe saya tak ka

milne mein kitne garm hain ye hae dekhiyo

kushta hun main to shola-ruKHon ke tapak ka

ai shola apni garm-rawi par na bhuliyo

aalam hai aur aah-e-dil-e-soz-nak ka

aata hai apne kushte ki turbat pe jab wo shoKH

ek nara wan se nikle hai ruhi-fidak ka

shukr-e-KHuda ki nam hai ismat ka 'mushafi'

roz-e-jaza gawah mere ishq-e-pak ka