tum aa gae ho to kyun intizar-e-sham karen

tum aa ga.e ho to kyuuñ intizār-e-shām kareñ

kaho to kyuuñ na abhī se kuchh ehtimām kareñ

ḳhulūs-o-mehr-o-vafā log kar chuke haiñ bahut

mire ḳhayāl meñ ab aur koī kaam kareñ

ye ḳhās-o-ām kī be-kār guftugū kab tak

qubūl kījiye jo faisla avaam kareñ

har aadmī nahīñ shā.ista-e-rumūz-e-suḳhan

vo kam-suḳhan ho muḳhātab to ham-kalām kareñ

judā hue haiñ bahut log ek tum bhī sahī

ab itnī baat pe kyā zindagī harām kareñ

ḳhudā agar kabhī kuchh iḳhtiyār de ham ko

tū pahle ḳhāk-nashīnoñ kā intizām kareñ

rah-e-talab meñ jo gumnām mar ga.e 'nāsir'

matā-e-dard unhī sāthiyoñ ke naam kareñ

tum aa gae ho to kyun intizar-e-sham karen

kaho to kyun na abhi se kuchh ehtimam karen

KHulus-o-mehr-o-wafa log kar chuke hain bahut

mere KHayal mein ab aur koi kaam karen

ye KHas-o-am ki be-kar guftugu kab tak

qubul kijiye jo faisla awam karen

har aadmi nahin shaista-e-rumuz-e-suKHan

wo kam-suKHan ho muKHatab to ham-kalam karen

juda hue hain bahut log ek tum bhi sahi

ab itni baat pe kya zindagi haram karen

KHuda agar kabhi kuchh iKHtiyar de hum ko

tu pahle KHak-nashinon ka intizam karen

rah-e-talab mein jo gumnam mar gae 'nasir'

mata-e-dard unhi sathiyon ke nam karen