tum agar chaho kabhi biphra samundar dekhna

tum agar chāho kabhī biphrā samundar dekhnā

chaudhvīñ meñ tum mirī āñkhoñ kā manzar dekhnā

jo havāle se mire mahfil meñ pahchāne ga.e

zikr par mere unhī logoñ ke tevar dekhnā

zaḳhm gin kar kyā karoge kār-e-jāñ-sozī hai ye

jo paḌe hoñge abhī raste meñ patthar dekhnā

log kahte haiñ ki tum patthar ho insāñ to nahīñ

ab to majbūrān paḌegā tum ko chhū kar dekhnā

aaj tak bhī maslahat-koshī hameñ aa.ī nahīñ

hai yahī to ek ḳhāmī apne andar dekhnā

us ko ab ham zulm samjheñ yā ki ġham-ḳhvārī tirī

ḳhud rulānā aur phir hamdard ban kar dekhnā

ye na ho ki nā-mukammal hī rahe manzil kā ḳhvāb

tez-raftārī meñ lag jaatī hai Thokar dekhnā

jab khaḌe hoñge ye sab fir.aun mulzim kī tarah

vo adālat jo lagegī roz-e-mahshar dekhnā

tum agar chaho kabhi biphra samundar dekhna

chaudhwin mein tum meri aankhon ka manzar dekhna

jo hawale se mere mahfil mein pahchane gae

zikr par mere unhi logon ke tewar dekhna

zaKHm gin kar kya karoge kar-e-jaan-sozi hai ye

jo paDe honge abhi raste mein patthar dekhna

log kahte hain ki tum patthar ho insan to nahin

ab to majburan paDega tum ko chhu kar dekhna

aaj tak bhi maslahat-koshi hamein aai nahin

hai yahi to ek KHami apne andar dekhna

us ko ab hum zulm samjhen ya ki gham-KHwari teri

KHud rulana aur phir hamdard ban kar dekhna

ye na ho ki na-mukammal hi rahe manzil ka KHwab

tez-raftari mein lag jati hai Thokar dekhna

jab khaDe honge ye sab firaun mulzim ki tarah

wo adalat jo lagegi roz-e-mahshar dekhna