tum ho qatra to qadam had se na bahar rakhna

tum ho qatra to qadam had se na bāhar rakhnā

dil magar saat samundar ke barābar rakhnā

zeb detī to hai dastār magar sarv-qado

sar zarā turra-e-dastār se bāhar rakhnā

justujū apnī zarūrat hai talab apnī ġharaz

kaam apnā hai to kyoñ baar kisī par rakhnā

zahr-e-ehsās kī talḳhī liye ghar mat jaanā

din to kajlāyā magar raat munavvar rakhnā

chārpā.ī ke barābar bhī farāḳhī na milī

paañv phailānā kahāñ aur kahāñ sar rakhnā

mauj-e-ḳhūñ sho.ala-numā shahr chaTaḳhtī lāsheñ

haa.e kis tarah se āñkhoñ meñ ye manzar rakhnā

sehn-e-jāñ taaza havā se na ho mahrūm 'ayāz'

ek dīvār uThānā to ka.ī dar rakhnā

tum ho qatra to qadam had se na bahar rakhna

dil magar sat samundar ke barabar rakhna

zeb deti to hai dastar magar sarw-qado

sar zara turra-e-dastar se bahar rakhna

justuju apni zarurat hai talab apni gharaz

kaam apna hai to kyon bar kisi par rakhna

zahr-e-ehsas ki talKHi liye ghar mat jaana

din to kajlaya magar raat munawwar rakhna

chaarpai ke barabar bhi faraKHi na mili

panw phailana kahan aur kahan sar rakhna

mauj-e-KHun shoala-numa shahr chaTaKHti lashen

hae kis tarah se aankhon mein ye manzar rakhna

sehn-e-jaan taza hawa se na ho mahrum 'ayaz'

ek diwar uThana to kai dar rakhna