tum jo KHwabon mein chale aate to achchha hota

tum jo ḳhvāboñ meñ chale aate to achchhā hotā

zehn-o-dil ko mire mahkāte to achchhā hotā

abr hai phuul haiñ aur ThanDī havāoñ kā surūr

aise meñ tum bhī jo aa jaate to achchhā hotā

jis tarah aaj taġhāful pe haiñ us ke nālāñ

ham agar pahle yuuñ jhuñjhlāte to achchhā hotā

aaj ye dard-e-judā.ī to nahīñ hotā hameñ

un se nazreñ na milā paate to achchhā hotā

ḳhair-maqdam hai janāb aap kā dil se lekin

saath meñ un ko bhī jo laate to achchhā hotā

sun ke iz.hār-e-mohabbat ko mire kaash ki tum

hoñToñ se phuul na barsāte to achchhā hotā

baar baar us ko manāne ke bajā.e ai 'zakī'

apne is dil ko jo samjhāte to achchhā hotā

tum jo KHwabon mein chale aate to achchha hota

zehn-o-dil ko mere mahkate to achchha hota

abr hai phul hain aur ThanDi hawaon ka surur

aise mein tum bhi jo aa jate to achchha hota

jis tarah aaj taghaful pe hain us ke nalan

hum agar pahle yun jhunjhlate to achchha hota

aaj ye dard-e-judai to nahin hota hamein

un se nazren na mila pate to achchha hota

KHair-maqdam hai janab aap ka dil se lekin

sath mein un ko bhi jo late to achchha hota

sun ke izhaar-e-mohabbat ko mere kash ki tum

honTon se phul na barsate to achchha hota

bar bar us ko manane ke bajae ai 'zaki'

apne is dil ko jo samjhate to achchha hota