tum KHunuk jazba ho be-tabi-e-fan kya jaano?

tum ḳhunuk jazba ho be-tābī-e-fan kyā jāno?

kyā guzartī hai dam-e-fikr-e-suḳhan kyā jāno?

ḳhuun hai dil meñ tumhāre abhī afsurda-ḳhirām

surḳh kyuuñ hote haiñ ruḳhsār-e-chaman kyā jāno?

maiñ huuñ kitne qad-o-gesū ke jahāñ kā me.amār

sargirāñ mujh se haiñ kyuuñ dār-o-rasan kyā jāno?

tum to karte ho mirī klik-e-suḳhan ko pāband

kaun hai kātib-e-taqdīr-e-vatan kyā jāno?

maiñ ki huuñ ḳhāk-nashīñ dushman-e-jām-e-ḳhusrav

maiñ hī piitā huuñ mai-e-taḳht-fagan kyā jāno?

tum ko hai naaz ki jakḌe hue ho vaqt ke paañv

kyuuñ badaltā hai zamāne kā chalan kyā jāno?

tum samajhte hī nahīñ ahl-e-gulistāñ kī zabāñ

mujh se kyā kahte haiñ ye sarv-o-saman kyā jāno?

tum to ho bā.is-e-afsurdagī-e-hāl-e-hunar

maiñ huuñ tābānī-e-mustaqbil-e-fan kyā jāno?

jin ko tum dete ho shorīda-sarī kā ilzām

haiñ vahī ḳhāk-basar tāj-shikan kyā jāno?

tum KHunuk jazba ho be-tabi-e-fan kya jaano?

kya guzarti hai dam-e-fikr-e-suKHan kya jaano?

KHun hai dil mein tumhaare abhi afsurda-KHiram

surKH kyun hote hain ruKHsar-e-chaman kya jaano?

main hun kitne qad-o-gesu ke jahan ka meamar

sargiran mujh se hain kyun dar-o-rasan kya jaano?

tum to karte ho meri klik-e-suKHan ko paband

kaun hai katib-e-taqdir-e-watan kya jaano?

main ki hun KHak-nashin dushman-e-jam-e-KHusraw

main hi pita hun mai-e-taKHt-fagan kya jaano?

tum ko hai naz ki jakDe hue ho waqt ke panw

kyun badalta hai zamane ka chalan kya jaano?

tum samajhte hi nahin ahl-e-gulistan ki zaban

mujh se kya kahte hain ye sarw-o-saman kya jaano?

tum to ho bais-e-afsurdagi-e-haal-e-hunar

main hun tabani-e-mustaqbil-e-fan kya jaano?

jin ko tum dete ho shorida-sari ka ilzam

hain wahi KHak-basar taj-shikan kya jaano?