tum KHwab mein aaoge ye malum nahin tha

tum ḳhvāb meñ aaoge ye ma.alūm nahīñ thā

phir ḳhvāb dikhāoge ye ma.alūm nahīñ thā

tum ka.abe ko Dhāoge ye ma.alūm nahīñ thā

dil toḌ ke jāoge ye ma.alūm nahīñ thā

jis ḳhat meñ tañke the mire ashkoñ ke sitāre

vo ḳhat bhī jalāo.ge ye ma.alūm nahīñ thā

kuchh aks mire ā.īna-ḳhāne se churā kar

mujh ko hī dikhāoge ye ma.alūm nahīñ thā

qad merā ghaTāoge mujhe is kī ḳhabar thī

saa.e ko baḌhāoge ye ma.alūm nahīñ thā

ye to mujhe ma.alūm thā tum jāoge lekin

is tarah se jāoge ye ma.alūm nahīñ thā

ik lamhe kī āvārā-nigāhī ke sahāre

dil meñ utar aaoge ye ma.alūm nahīñ thā

tum holī bhī kheloge mire dil ke lahū se

dāman bhī bachāoge ye ma.alūm nahīñ thā

hairat meñ haiñ ahbāb ki is umr meñ qaisar

yuuñ dhuum machāoge ye ma.alūm nahīñ thā

tum KHwab mein aaoge ye malum nahin tha

phir KHwab dikhaoge ye malum nahin tha

tum kabe ko Dhaoge ye malum nahin tha

dil toD ke jaoge ye malum nahin tha

jis KHat mein tanke the mere ashkon ke sitare

wo KHat bhi jalaoge ye malum nahin tha

kuchh aks mere aaina-KHane se chura kar

mujh ko hi dikhaoge ye malum nahin tha

qad mera ghaTaoge mujhe is ki KHabar thi

sae ko baDhaoge ye malum nahin tha

ye to mujhe malum tha tum jaoge lekin

is tarah se jaoge ye malum nahin tha

ek lamhe ki aawara-nigahi ke sahaare

dil mein utar aaoge ye malum nahin tha

tum holi bhi kheloge mere dil ke lahu se

daman bhi bachaoge ye malum nahin tha

hairat mein hain ahbab ki is umr mein qaisar

yun dhum machaoge ye malum nahin tha