tumko dekha hai abhi tak ye guman hota hai

tum ko dekhā hai abhī tak ye gumāñ hotā hai

naqsh jo dil meñ hai āñkhoñ se nihāñ hotā hai

shauq kā ālam-e-e.ajāz ayaañ hotā hai

khiñch ke aatā hai yahāñ husn jahāñ hotā hai

qissa-e-dard ḳhamoshī se ayaañ hotā hai

taur-e-iz.hār nazar tarz-e-bayāñ hotā hai

raat ḳhāmosh hai aise meñ sitāro sun lo

dil-e-muztar mirā mā.il-ba-fuġhāñ hotā hai

merī nākām mohabbat ne baḌā kaam kiyā

mudda.ā ālam-e-hasrat meñ javāñ hotā hai

ḳhirman-e-zīst meñ sho.ale na bhaḌak uThe hoñ

dāman-e-dil ke qarīb aaj dhuāñ hotā hai

zikr ḳhud chheḌ ke royā kiyā pahroñ 'aḳhtar'

naam aate hī tirā ashk ravāñ hotā hai

tum ko dekha hai abhi tak ye guman hota hai

naqsh jo dil mein hai aankhon se nihan hota hai

shauq ka aalam-e-eajaz ayan hota hai

khinch ke aata hai yahan husn jahan hota hai

qissa-e-dard KHamoshi se ayan hota hai

taur-e-izhaar nazar tarz-e-bayan hota hai

raat KHamosh hai aise mein sitaro sun lo

dil-e-muztar mera mail-ba-fughan hota hai

meri nakaam mohabbat ne baDa kaam kiya

muddaa aalam-e-hasrat mein jawan hota hai

KHirman-e-zist mein shoale na bhaDak uThe hon

daman-e-dil ke qarib aaj dhuan hota hai

zikr KHud chheD ke roya kiya pahron 'aKHtar'

nam aate hi tera ashk rawan hota hai