tumko to kabhi dil se bulana nahin aata

tum ko to kabhī dil se bulānā nahīñ aatā

ham aa ke jo baiThe haiñ to jaanā nahīñ aatā

kah duuñ to maze par ye fasāna nahīñ aatā

Thahrūñ to palaT kar ye zamāna nahīñ aatā

kaahe ko ye phir hosh meñ laane ke Thahoke

jaao tumheñ dīvāna banānā nahīñ aatā

aatī hai bahār aur luTā detī hai daulat

ik phuul kī muTThī meñ ḳhazāna nahīñ aatā

tum ko to ye aatā hai ki yaad aa.e chale jaao

ham tum ko bhulā.eñ to bhulānā nahīñ aatā

maqdūr thā bas ek hī sajda tire dar par

sar maiñ ne jhukāyā hai uThānā nahīñ aatā

aatī hai hameñ sirf mohabbat kī ġhulāmī

ehsān mohabbat kā jatānā nahīñ aatā

phir laakh mohabbat ko 'razā' koī sañvāre

āġhāz-e-mohabbat kā zamāna nahīñ aatā

tum ko to kabhi dil se bulana nahin aata

hum aa ke jo baiThe hain to jaana nahin aata

kah dun to maze par ye fasana nahin aata

Thahrun to palaT kar ye zamana nahin aata

kahe ko ye phir hosh mein lane ke Thahoke

jao tumhein diwana banana nahin aata

aati hai bahaar aur luTa deti hai daulat

ek phul ki muTThi mein KHazana nahin aata

tum ko to ye aata hai ki yaad aae chale jao

hum tum ko bhulaen to bhulana nahin aata

maqdur tha bas ek hi sajda tere dar par

sar main ne jhukaya hai uThana nahin aata

aati hai hamein sirf mohabbat ki ghulami

ehsan mohabbat ka jatana nahin aata

phir lakh mohabbat ko 'raza' koi sanware

aaghaz-e-mohabbat ka zamana nahin aata