tumko wapas bulati pukaron ke dukh tum nahin jaante

tum ko vāpas bulātī pukāroñ ke dukh tum nahīñ jānte

paañv paḌte hue chup ke māroñ ke dukh tum nahīñ jānte

jab zarūrat kī miqdār baḌhtī hai sab Dūbne lagte haiñ

ham nasheboñ ke ābād-kāroñ ke dukh tum nahīñ jānte

ek ūñchā.ī par ḳhud ko taslīm kartī masarrat ke baad

nīche girte hue ābshāroñ ke dukh tum nahīñ jānte

ek arsa yahāñ zindagī apnī taulīd kartī rahī

in khañDar oḌhte sabza zāroñ ke dukh tum nahīñ jānte

kitnī duniyā.eñ tasḳhīr hone kī ḳhvāhish meñ betāb haiñ

in pahāḌoñ meñ maujūd ġhāroñ ke dukh tum nahīñ jānte

ham samājī ġhulāmoñ pe apne liye sochnā band hai

ek sūraj ke hote sitāroñ ke dukh tum nahīñ jānte

tum nahīñ jānte past zehnoñ ke mābain fikr-e-rasā

khā.iyoñ meñ ghire kohsāroñ ke dukh tum nahīñ jānte

monalisa kī muskān us ke badan kā ḳhulāsa nahīñ

dekhne vaalo in shāhkāroñ ke dukh tum nahīñ jānte

maiñ ne 'ġhālib' ko dillī kā pursa diyā 'faiz' goyā hue

mere bachche abhī mere yāroñ ke dukh tum nahīñ jānte

bānū-e-sub.h jab raushnī kī rasad roktī hai 'munīr'

vaqt ko pesh aate ḳhasāroñ ke dukh tum nahīñ jānte

tum ko wapas bulati pukaron ke dukh tum nahin jaante

panw paDte hue chup ke maron ke dukh tum nahin jaante

jab zarurat ki miqdar baDhti hai sab Dubne lagte hain

hum nashebon ke aabaad-karon ke dukh tum nahin jaante

ek unchai par KHud ko taslim karti masarrat ke baad

niche girte hue aabshaaron ke dukh tum nahin jaante

ek arsa yahan zindagi apni taulid karti rahi

in khanDar oDhte sabza zaron ke dukh tum nahin jaante

kitni duniyaen tasKHir hone ki KHwahish mein betab hain

in pahaDon mein maujud ghaaron ke dukh tum nahin jaante

hum samaji ghulamon pe apne liye sochna band hai

ek suraj ke hote sitaron ke dukh tum nahin jaante

tum nahin jaante past zehnon ke mabain fikr-e-rasa

khaiyon mein ghire kohsaron ke dukh tum nahin jaante

monalisa ki muskan us ke badan ka KHulasa nahin

dekhne walo in shahkaron ke dukh tum nahin jaante

main ne 'ghaalib' ko dilli ka pursa diya 'faiz' goya hue

mere bachche abhi mere yaron ke dukh tum nahin jaante

banu-e-subh jab raushni ki rasad rokti hai 'munir'

waqt ko pesh aate KHasaron ke dukh tum nahin jaante